ნაწამები ბიჭის ნათესავების ულტიმატუმი ხელისუფლებას - ოჯახი მეორე სპეცრაზმელის დაკავებას ითხოვს წინააღმდეგ შემთხვევაში ცხედარს პროკურატურასთან დაასვენებს

სამართალი - 10:28, 07 Jan, 2020

1875

"დამპალოს სასაფლაოზე" ნაწამები ბიჭის ოჯახის ულტიმატუმი ხელისუფლებას - მოკლული მურად წურწუმიას ოჯახი საქმის ობიაეტურ გამოძიებას ითხოვს, წინააღმდეგ შემთხვევაში ცხედრის პროკურატურასთან დასვენებით იმუქრება.

ოჯახის თქმით, მთავარმა საგამოძიებო ორგანომ მეორე სპეცრაზმელი საქმიდან გააქრო, დაკავებულ სამართალდამცავს კი მსუბუქი მუხლი წაუყენეს.

წურწუმიების თქმით, პროკურატურამ შობის ღამეს დატრიალებული სადისტური მკვლელობის შემდეგ მხოლოდ ერთი სპეცრაზმელი დააკავა, რომელსაც არა განზრახ მკვლელობას, არამედ ჯანმრთელობის განზრახ მძიმე დაზიანებას ედავებიან.

"კარგად იცოდეს მთავრობამ - ჩემი შვილის მკვლელობას არავის ვაპატიებ. სასწრაფოდ დააკაონ მეორე სპეცრაზმელი და სათანადოდ დასაჯონ! მიწიდან რომ მომიწიოს ჩემი ძმის ცხედრის ამოთხრა, ამოვთხრი და პროკურატურასთან დავასვენებ!"- აცხადებს მოკლულის ძმა.

ვარკეთილის სასაფლაოზე 24 წლის ბიჭი ბედობის ღამეს აწამეს. მურად წურწუმიას თვალი ჰქონდა ამოთხრილი და თავის ქალა გატეხილი. ოჯახის ინფორმაციით, ორმა სპეცრაზმელმა 24 წლის მამაკაცი ტანსაცმლის გარეშე, უგონო მდგომარეობაში ყინვაში მიატოვეს. ბიჭი კლინიკაში გარდაიცვალა.

მომხდარის ერთადერთი თვითმხილველი გარდაცვლილის ძმა, 21 წლის მუხრან წურწუმიაა. მისი თქმით, მამის საფლავზე ასულ ძმებს ორ სპეცრაზმელთან მოუვიდათ ჩხუბი, ნაცემმა მუხრან წურწუმიამ გაქცევა მოახერხა, მურად წურწუმია კი სპეცრაზმელების ხელში აღმოჩნდდა.

მუხრან წურწუმია ყვება, რომ მან მხოლოდ სახლში მისვლის შემდეგ აღმოაჩინა, რომ მურადმა გაქცევა ვერ მოახერხა. რის შემდეგაც ის სასაფლაოზე დაბრუნდა, თუმცა, საფლავზე მხოლოდ სისხლიანი ტანსაცმელი იპოვნა.