დაახლოებით ერთი საათის წინ დასრულდა სასამართლოს სხდომა, სადაც ყოფილი თავდაცვისა და შს მინისტრის ბაჩო ახალაიას ახალი ბრალდების დეტალები განიხილეს.

შეგახსენებთ, რომ ბაჩო ახალაიას გუშინ პროკურატურამ სანდრო გირგვლიანის საქმესთან დაკავშირებით ახალი ბრალი წაუყენა – თანამდებობრივი უფლებამოსილების გადამეტებაში დაადანაშაულა და აღმკვეთი ღონისძიების სახით წინასწარი პატიმრობა მოითხოვა.

იმის მიუხედავად, რომ თავად ეს ბრალდება 0–დან 3 წლამდე თავისუფლების აღკვეთას ითვალისწინებს, მოსამართლე გიორგი არევაძემ არ გაითვალისწინა დაცვის პოზიცია და ბაჩო ახალაიას წინასწარი პატიმრობა შეუფარდა. ეს უკვე მეხუთე შემთხვევაა, როცა ბაჩო ახალაიას აღმკვეთი ღონისძიების სახით სასამართლო წინასწარ პატიმრობას უსჯის.

გადაწყვეტილების გამოცხადებას ხმაური მოჰყვა თბილისის საქალაქო სასამართლოს ეზოში, სადაც შეკრებილი იყვნენ ბაჩო ახალაიას ოჯახის წევრები, ახლობლები და მხარდამჭერები.