"ერთმა პოლიციელმა მეორეს უთხრა, გუშინდელის გამო სამსახურიდან მივდივარ, სოფელში წავალ, ვენახს მოვუვლი, კაცი მაინც მერქმევაო..."

"ერთმა პოლიციელმა მეორეს უთხრა, გუშინდელის გამო სამსახურიდან მივდივარ, სოფელში წავალ, ვენახს მოვუვლი, კაცი მაინც მერქმევაო..." - რას წერს დიალოგის შემთხვევითი მოწმე

სოც.მედია - 16:42, 18 Dec, 2019

2485

ირმა კახურაშვილი ფეისბუქში იმ დიალოგის შესახებ წერს, რომლის მოწმე შემთხვევით გახდა. მისი თქმით, საუბარი ორ პოლიციელს შორის შედგა და 15 წლის მოზარდის ლუკა სირაძის სკანდალურ საქმეს ეხებოდა:

"დღეს მეტროში ერთი ახალგაზრდა პოლიციელი მეორეს ეუბნება, გუშინდელი ამბის გამო სამსახურიდან მივდივარო, კვირის ბოლოს უნდა ვუთხრაო. მეორე ეუბნება, მერე სად წახვალ, შე ჩემა და ის პასუხობს, მშობლებთან წავალ, სოფელში, ვენახში მივეხმარები მამაჩემსო. კაცი მაინც მერქმევაო.აი, ასე", - წერს ირმა კახურაშვილი.

შეგახსენებთ, 15 წლის ლუკა სირაძე "მწვანე სკოლის" მოსწავლე იყო. მან 11 დეკემბერს სკოლის შიდა და გარე ტერიტორიაზე სხვადასხვა წარწერა დატოვა, რის შემდეგაც პოლიციამ სკოლაში დარეკა და გამოძიება დაიწყო. სავარაუდოდ, დაკითხვის დროს მოზარდმა ფსიქოლოგიური ზეწოლა განიცადა.

თავდაპირველად, შსს უარყოფდა ზეწოლის ფაქტს, თუმცა გუშინ, მოზარდის გარდაცვალების შემდეგ დააკავეს დიდუბე-ჩუღურეთის პოლიციის განყოფილების გამომძიებელი მარინა ჩოლოიანი და ბრალად სს კოდექსის 335-ე მუხლი წაუყენეს, რაც ჩვენების მიჩემის იძულებას გულისხმობს.

მოზარდის გარდაცვალების შემდეგ საპროტესტო აქციები როგორც თბილისში, ასევე რეგიონებში გაიმართა. საპროტესტო აქციები მომდევნო დღეებშიცაა დაანონსებული. პროტესტის ფონზე შს მინისტრის გადადგომასაც ითხოვენ.