სოჭში მომხდარი შემთხვევა რუსულმა მედიასაშუალებებმა სასწაულად მონათლეს: ივერიის ხატისთვის პატივის მიგების დღეს, 13 ოქტომბერს ზღვამ ოლიმპიურ ქალაქში ივერიის ღვთისმშობლის ხატი გამორიყა, რომელიც ტურისტებმა იპოვეს და ახლომდებარე, წმინდა ნინოს სახელობის ტაძარში გადააბრძანეს.

„ოლიმპიურ სოჭს ღმერთმა სასწაული მოუვლინა“, – ამ ხმაურიანი სათაურით ბეჭდავს სტატიას რამდენიმე რუსული გამოცემა. სტატიის მიხედვით, შემთხვევა გოლოვინკის დასახლებაში მოხდა.

ტაძარში დაადგინეს, რომ ხატი 1896 წელსაა მოჭედილი, ვერცხლისა და ძვირფასი თვლებისგან. მასზე არის წარწერა: „პროტოპრესვიტერი ალექსნდრე სმირნოვი“, რომელსაც ხატის დამწერად მოიაზრებენ.

სოჭის ადმინისტრაციის პრესსამსახური იტყობინება, რომ ხატი ნაწილობრივ დაზიანებულია, თუმცა იმის მიუხედავად, რომ ზღვის ტალღებში იყო, მაინც კარგად გამოიყურება და მასზე ღვთისმშობლის გამოსახულება ნათლად იკვეთება. 

პრესსამსახური იტყობინება, რომ 26 ოქტომბერს, ამ შემთხვევის გამო ტაძარში საზეიმო ლიტურგია აღევლინება.