არასრულწლოვანთა პორნოგრაფიის საქმე - "მშობლებმა იცოდნენ, რომ პორნომასალას იღებდნენ, ეს სოცქსელში მიმოწერითაც დასტურდება"

არასრულწლოვანთა პორნოგრაფიის საქმე - "მშობლებმა იცოდნენ, რომ პორნომასალას იღებდნენ, ეს სოცქსელში მიმოწერითაც დასტურდება"

სამართალი - 13:16, 07 Dec, 2019

1751

არასრულწლოვანთა პორნოგრაფიის უკანონოდ დამზადება-გასაღებისა და ტრეფიკინგის ბრალდებით დაკავებული 11 პირის სასამართლო პროცესი მიმდინარეობს.

თბილსის საქალაქო სასამართლოში მიმდინარე სხდომაზე დაკავებულების მიმართ აღკვეთის ღონისძიების შეფარდებაზე იმსჯელებენ.

პროკურატურა დაკავებულების მიმართ აღკვეთის ღონისძიების სახით პატიმრობის შეფარდებას, დაცვის მხარე კი, დაკავებულების აღკვეთის ღონისძიების გარეშე დატოვებას მოითხოვს.

დაკავებულთა უფლებადამცველები აცხადებენ, რომ სახელმწიფო ბრალდებას არ აქვს საფუძვლიანი მტკიცებულება ბრალდების დასამტკიცებლად. შესაბამისად, იურისტები დაკავებულების გირაოს სანაცვლოდ გათავისუფლებას ითხოვენ.

"სრული პასუხისმგებლობით მინდა განვაცხადო, რომ არავითარი მტკიცებულება, რაც უშუალოდ წარდგენილ ბრალდებას დაადასტურებდა, არ არსებობს. ჩვენი შუამდგომლობა იქნება, არ შეეფარდოს არცერთი სახის აღკვეთის ღონისძიება, თუმცა ალტერნატივის სახით მაინც გირაოს გამოყენებასაც მოვითხოვთ," - განაცხადა ადვოკატმა ნოდარ ცინცაძემ.

პროკურორ მარიამ გოგორელიანის თქმით, დაკავებული პირები ინფორმირებულები იყვნენ, თუ რა ტიპის იყო გადაღებები და ეს დასტურდება სოციალურ ქსელში მათი მიმოწერითაც:

"ყველა მათგანი ინფორმირებული იყო აღნიშნული ფოტოსესიის შინაარსის შესახებ, ყველა მათგანს თვითონ მიჰყავდა თავისი შვილი ფოტოების გადასაღებად, იმყოფებოდა იმავე ბინაში უღებდნენ ფოტოებს. ბრალდების მხარეს აქვს არაერთი მტკიცებულება ამის დასადასტურებლად. გარდა იმისა, რომ არსებობს ფოტო-ვიდეომასალა, სადაც არის პორნოგრაფია ასახული, ასევე არის ფარული საგამოძიებო მოქმედებების ჩანაწერები, სხვადასხვა სოციალური ქსელებით მიმოწერები ბრალდებულებს შორის, რითაც დასტურდება რომ გარდა იმისა, რომ იცოდნენ შინაარსი, აგრეთვე ანაზღაურების მიღების ფაქტიც," - განაცხადა პროკურორმა.

შეგახსენებთ, არასრულწლოვანთა პორნოგრაფიის საქმეზე დაკავებული 11 პირიდან ერთ-ერთი სკოლის მასწავლებელია. დანარჩენი კი არასრულწლოვანთა მშობლები არიან. ამ საქმეზე უკვე 22 პირია დაკავებული.

სხდომა დახურულ რეჟიმში მიმდინარეობს.