"პიცა მინდა პეპერონით" - ზარი 911-ში, რომლის საშუალებითაც შვილმა დედა ცემას გადაარჩინა

ეს საინტერესოა - 10:38, 24 Nov, 2019

4254

აშშ-ის შტატ ოჰაიოს ქალაქ ორეგონში, 911-ში უცნაური ზარი შემოვიდა. პატარა გოგონამ შეშფოთებული ხმით ოპერატორს პიცა შეუკვეთა. ოპერატორს თავდაპირველად ეგონა, რომ მას ნომერი შეეშალა, თუმცა განმეორებითი შეკითხვის დროს, გოგონამ პიცა უფრო დაჟინებით მოითხოვა და მისამართი რამდენჯერმე გაიმეორა. ოპერატორი მიხვდა, რომ საქმე სერიოზული იყო და დამაზუსტებელი კითხვა დაუსვა გოგონას:

"ოპერატორი: - საფრთხე სერიოზულია?

გოგონა: - დიახ, დიდი პიცა მინდა...

ოპერატორი: სამედიცინო დახმარებაც გჭირდებათ?

გოგონა: დიახ, დიდი პიცა პეპერონით..."

ამ პასუხების შემდეგ ოპერატორმა გოგონას მისამართი პოლიციას გადაუგზავნა და უთხრა, რომ ადგილზე სპეციალური სირენების ჩართვის გარეშე მისულიყვნენ.

როგორც გაირკვა, გოგონას დედას მთვრალი პარტნიორი მიუვარდა სახლში და ცემა დაუწყო. იგი ადრეც ძალადობდა ქალზე და გოგონამ დედის გადასარჩენად 911-ზე დარეკვა გადაწყვიტა, მაგრამ შეეშინდა, რომ მოძალადე მის ზარს გაიგონებდა და ეშმაკური ხერხი მოიგონა.

მას გაახსენდა, რომ რამდენიმე ხნის წინ სოცქსელებში მიმდინარეობდა სპეციალური კამპანია, რომლის მიზანი იყო მოსახლეობისთვის მიეწოდებინათ სხვადასხვა ხერხი, თუ როგორ მიემართათ პოლიციისთვის ძალადობის შემთხვევაში, თუ ღია ზარის განხორციელება შეუძლებელია. ერთერთი მეთოდი იყო 911-ში დარეკვა და პაროლი "პეპერონის" თქმა.

ადგილობრივმა პოლიციამ სათანადოდ დააფასა როგორც გოგონას გონიერი ნაბიჯი ასევე 911-ის ოპერატორის, ტიმ ტენეიკის, მიხვედრილობა. მოძალადე - 56 წლის საიმონ ლოპესი, პოლიციამ ადგილზე დააპატიმრა.

მსგავსი სიტუაციების დროს სხვადასხვა ქვეყანაში მრავალი მეთოდი მოქმედებს. მაგალითად ბრიტანეთში ნომერ 999-ზე დარეკვა და დუმილი საკმარისია, რომ ოპერატორი მიხვდეს, რომ დამრეკს საფრთხე ემუქრება. ასევე ბრიტანელებს სთავაზობენ, რომ ტელეფონი ჩართული დატოვონ, რათა ოპერატორმა გაიგონოს თუ რა ხდება ამ დროს ადგილზე.