პროექტი სსიპ „ბავშვთა და ახალგაზრდობის ფონდის“ მხარდაჭერით ხორციელდება და მიზნად ისახავს, ერთიმხრივ, ახალგაზრდების - სკოლის დამამთავრებელი კლასების მოსწავლეებისა და სტუდენტების ცნობიერების ამაღლებას კონსტიტუციურ-სამართლებრივ პრინციპებთან და ინსტიტუტებთან დაკავშირებით, ხოლო, მეორემხრივ, სარეკომენდაციო დოკუმენტის შემუშავების გზით მათი ჩართულობის უზრუნველყოფას ქვეყანაში მიმდინარე კონსტიტუციურ პროცესებში.

„ნიშანდობლივია, რომ პროექტის მიმდინარეობა დროში ზუსტად დაემთხვა ქვეყანაში მორიგი საკონსტიტუციო რეფორმის დაწყების მომენტს, ამასთან დაკავშირებით ნოემბერში სახელმწიფო საკონსტიტუციო კომისიაც შეიკრიბება.

აღნიშნული რეფორმა სამომავლოდ აუცილებლად უნდა იქცეს ჩვენი კონსტიტუციის სტაბილურობის გარანტად. შესაბამისად, მნიშვნელოვანია, რომ მასში სამოქალაქო საზოგადოება, ქვეყნის თითოეული მოქალაქე აქტიურად იყოს ჩართული, მათ შორის, ახალგაზრდებიც. ჩვენი ორგანიზაციის მიერ განხორციელებული პროექტი სწორედ მიმდინარე კონსტიტუციური პროცესის აქტუალურ აპსექტებზე ახალგაზრდების აზრის შესწავლასა და შემდგომში მათ ადვოკატირებაზეა ორიენტირებული.

შეხვედრებზე ფიქსირდება უამრავი საინტერესო პოზიცია, რომელიც პროექტის განმახორციელებელი ჯგუფის მიერ დეტალურად აღინუსხება და საბოლოოდ სარეკომენდაციო დოკუმენტში აისახება. ხსენებული დოკუმენტი დაახლოებით ერთ თვეში იქნება საჯაროდ ხელმისაწვდომი და გადაეცემა შესაბამის სახელისუფლებო სტრუქტურებს. ვიმედოვნებთ, რომ სახელმწიფო საკონსტიტუციო კომისიის მუშაობის ფორმატშიც, შესაძლებლობა მოგვეცემა პროექტის შედეგების გათვალისწინებით მოვახდინოთ კონკრეტული წინადადებების ინიცირება და აქტიურად ჩავერთოთ ქვეყნის უზენაესი კანონის ახალი რედაქციის შემუშავების პროცესში.“ - აცხადებს ასოციაციის პრეზიდენტი, თორნიკე ჭეიშვილი.

აღსანიშავია, რომ „საქართველოს ახალგაზრდა კონსტიტუციონალისტთა ასოციაციამ“ უკვე გამართა შეხვედრები: მარნეულში, ზუგდიდში, მესტიაში, ქუთაისში, ბათუმსა და თელავში მცხოვრებ ახალგაზრდებთან, რომლებშიც საერთო ჯამში 400-ამდე სკოლის მოსწავლემ და სტუდენტმა მიიღო მონაწილეობა.

ამასთან, ასოციაცია მადლობას უხდის ადგილობრივ მედიასაშუალებებს ზემოხსენებული შეხვედრების შესახებ ინფორმციის ინტენსიურად გავრცელებისთვის.