წყაროს ინფორმაციით, 6 არასრულწლოვანს თელავის რაიონულმა პროკურატურამ ბრალი წაუყენა თელავში, ჭავჭავაძის ქუჩაზე პრეზიდენტობის კანდიდატის ნინო ბურჯანაძის საარჩევნო ბანერის დაზიანების გამო. სასამართლომ ბრალდებულ ბავშვებს აღკვეთის ღონისძიების სახით, მშობლების მეთვალყურეობის ქვეშ ყოფნა შეუფარდა.

როგორც კახეთის საინფორმაციო ცენტრს თელავის რაიონული პროკურატურის პროკურორმა ქეთევან ვაშაკიძემ განუცხადა, არასრულწლოვნების ვინაობის დადგენა „თიბისი ბანკის“ სათვალთვალო კამერების მეშვეობით მოხდა.

„თელავის სასამართლოში გაიმართულ წინასასამართლო სხდომაზე, ნინო ბურჯანაძის ბანერის დაზიანებაში ბრალდებულ 6 არასრულწლოვანს, სასამართლომ აღკვეთის ღონისძიების სახით მშობლების მეთვალყურეობის ქვეშ ყოფნა შეუფარდა. აღნიშნული დანაშაულის კატეგორია ნაკლებად მძიმეა და არასრულწლოვანთა მიმალვის საშიშროებაც თითქმის არ არსებობს. თუმცა, გამოძიება კვლავ მიმდინარეობს“,– აღნიშნა პროკურორმა.

თელავში, ჭავჭავაძის ქუჩაზე, ნინო ბურჯანაძის საარჩევნო ბანერი 4 ოქტომბერს, ბასრი საგნით დააზიანეს. მომხდარზე სისხლის სამართლის საქმე 187–ე მუხლის პირველი ნაწილით აღიძრა, რაც ნივთის განზრახ დაზიანება – განადგურებას გულისხმობს. დანაშაული სასჯელის სახით 1–დან 3 წლამდე თავისუფლების აღკვეთას, ჯარიმას ან საზოგადოებისთვის სასარგებლო შრომას ითვალისწინებს.