მისი განცხადებით, სამინისტროში გამოძიება ეფექტურად მიმდინარეობს, უახლოეს მომავალში საზგადოებისთვის ცნობილი გახდება გამოძიების დეტალები და ყველა კითხვას პასუხი გაეცემა: „მათ ჰქონდათ უფლება, რომ შეექმნათ ეს კომისია, მაგრამ მე ვფიქრობ, რომ ეს კომისია არ იქნება ეფექტური, ვინაიდან გამოძიება ძალიან ეფექტურად მიმდინარეობს. გამოძიება ძალიან მალე დასრულდება და ჩვენ ყველა კითხვას პასუხს გავცემთ“, - განაცხადა ირაკლი ღარიბაშვილმა.

სასჯელაღსრულების მინისტრის თქმით, მისთვის უცნობია, თუ რა ფუნქცია უნდა ჰქონდეს კომისიას მაშინ, როცა სამართლებრივი ბერკეტები არ გააჩნია: „გამოძიება მიმდინარეობს სრული ტემპით, პრაქტიკულად უამრავი მტკიცებულება არსებობს და კომისია რას იზამს, ეს უკვე მისი საქმეა. მე არც მანდატის შესახებ და არც მათი მუშაობის შესახებ არაფერი არ ვიცი“, - აღნიშნა სუბარმა.

ადამიანის უფლებათა დაცვის საპარლამენტო კომიტეტის თავმჯდომარის განცხადებით, გამოძიება პროკურატურისა და შინაგან საქმეთა სამინისტროს პრეროგატივაა და ეს საქმე მათ უნდა გამოიძიონ: „მე დარწმუნებული ვარ, რომ შინაგან საქმეთა სამინისტრო და პროკურატურა ყველა ძალიან მნიშვნელოვან საკითხს, როგორ და რატომ ჩატარდა ეს სპეცოპერაცია და რატომ იყო ამხელა მსხვერპლი, ამ კითხვებს პასუხი გაეცემა, რაც შეეხება საზოგადოებრივ კომისიას, ბუნებრივია, მათ ამის უფლება აქვთ და ძალიან კარგია, თუ დამატებით ინფორმაციასა და ფაქტებს მოიპოვებენ და მიაწვდიან გამოძიებას“, - განაცხადა ეკა ბესელიამ. პარლამენტის დადგენილებით შინაგან საქმეთა სამინისტრო ვალდებულია, გამოძიების შედეგები საპარლამენტო კომისიას გადაუგზავნოს.