რესტორნების ქსელი M|group აქვეყნებს თბილისში, რესტორან „პურის სახლში“ გადაღებულ ფოტოს, რომელიც კვების ობიექტში ცნობილი ფრანგი მსახიობის, რუსეთის მოქალაქის ჟერარ დეპარდიეს ყოფნის დროსაა გადაღებული.

სავარაუდოდ, ფოტოზე მონტაჟის შედეგად მოჭრილია პირი ან პირები, ვისთან ერთადაც დეპარდიემ ფოტო გადაიღო.

შეგახსენებთ, რომ ჟერარ დეპარდიეს თბილისში ყოფნის შესახებ ინფორმაცია გუშინ გავრცელდა. 

ის თბილისის გავლით ბაქოში მიფრინავდა და, ოფიციალური ინფორმაციით, ტრანზიტული ზონა არ დაუტოვებია, აქედან გამომდინარე კი არ დაურღვევია კანონი „ოკუპაციის შესახებ“, თუმცა, თბილისის აეროპორტსა და რესტორან „პურის სახლში“ გადაღებულ ფოტოებზე ჩანს, რომ მსახიობს ერთი და იგივე ტანსაცმელი აცვია.

შეგახსენებთ, რომ ჟერარ დეპარდიემ ცოტა ხნის წინ ოკუპირებულ აფხაზეთში, საქართველოს ხელისუფლებისადმი ოფიციალური მიმართვის გარეშე იმოგზაურა. 

ის აფხაზეთში რუსეთის ტერიტორიიდან შევიდა, რითაც კანონი „ოკუპაციის შესახებ“ დაარღვია.