5 ლარის გამო დაწყებული კამათი და მოკლული ტაქსის მძღოლი:"მოკლულმა ბრალდებულს დედა, შემდეგ კი გარდაცვლილი ტყუპისცალი შეაგინა"

სამართალი - 10:38, 31 Oct, 2019

4877

ტაქსის მძღოლის მკვლელობაში ბრალდებული 23 წლის გიორგი ნიჟარაძესის ადვოკატი, ირწმუნება, რომ მისი დაცვის ქვეშ მყოფს ფსიქოლოგიური პრობლემები აქვს და მკურნალობას საჭიროებს.

ადვოკატის აღნიშნავს, რომ ახალგაზრდას ტყუპისცალი ძმის გარდაცვალების შემდეგ ფსიქოლოგიორი პრობლემები აღენიშნება.

ავთანდილ ტყებუჩავა მკვლელობის მოტივზე საუბრობს და აცხადებს, რომ უთანხმოება ტაქსით მგზავრობის საფასურმა გამოიწვია. კერძოდ, ადვოკატის ინფორმაციით, ნიჟარაძე მიხეილ კაჭარაძეს შეუთანხმდა, რომ გზავრობის საფასურსს, 15 ლარს გადაუხდიდა. ადგილზე მისვლის შემდეგ, გიორგი ნიჟარაძე ნათესავთან ავიდა ფულის გამოსართმევად, ტაქსის მძღოლს კი საბუთები დაუტოვა.

ავთანდილ ტყებუჩავას მონაყოლის თანახმად, ახალგაზრდას ნათესავმა 10 ლარი მისცა, რის გამოც ტაქსის მძღოლსა და ბრალდებულს შორის კონფლიქტი მოხდა.

ადვოკატი აცხადებს, რომ ტაქსის მძღოლმა ბრალდებულს დედა, შემდეგ კი გარდაცვლილი ტყუპისცალი შეაგინა.

ადვოკატი ირწმუნება, რომ ტაქსის მძღოლის გარდაცვალების მიზეზი დადგენილი არ არის.

ავთანდილ ტყებუჩავა ექიმის უყურადღებობაზე ამახვილებს ყურადღებას.

ცნობისთვის, თბილისის საქალაქო სასამართლომ ვარკეთილში ტაქსის მძღოლის მკვლელობაში ბრალდებულ გიორგი ნიჟარაძეს აღკვეთის ღონისძიებად პატიმრობა შეუფარდა. მოსამართლე რომან ხორავამ ბრალდების მხარის შუამდგომლობა დააკმაყოფილა.

დაცვის მხარე აღკვეთის სახით 10 000 ლარიან გირაოს ითხოვდა. ცნობისთვის, სამართალდამცველებმა ბრალდებული ცხელ კვალზე, მომხდარიდან ერთი საათის შემდეგ დააკავეს. პოლიციამ დაკავებულის პირადი ჩხრეკისას, დანაშაულის ჩადენის იარაღი - დანა ნივთმტკიცებად ამოიღო.

ვარკეთილში თბილისში ტაქსის მძღოლი 27 ოქტომბერს მოკლეს. მკვლელობის ფაქტზე, 1996 წელს დაბადებული პირი დააკავეს. საქმის მასალების თანახმად, შუახნის მამაკაცი ურთიერთშელაპარაკების ნიადაგზე ცივი იარაღით დაჭრეს. მამაკაცი საავადმყოფოში გადაიყვანეს, თუმცა მისი გადარჩენა ვერ მოხერხდა.

შინაგან საქმეთა სამინისტრომ გამოძიება სისხლის სამართლის კოდექსის 108-ე მუხლით დაიწყო, რაც განზრახ მკვლელობას გულისხმობს და შვიდიდან 15 წლამდე ვადით თავისუფლების აღკვეთას ითვალისწინებს.