ვილფრედ მარტენსი - საქართველოს მეგობარი და მხარდამჭერი

საზოგადოება - 18:59, 19 Oct, 2013

2113

"საქართველო ევროპული ქვეყანაა, რომელიც ევროკავშირის წევრი გახდება", - ეს განცხადება "ევროპის სახალხო პარტიის" პრეზიდენტს, ვილფრედ მარტენსს ეკუთვნის.

მარტენსი საქართველოსადმი დადებითი შეფასებებითა და პოზიციით გამოირჩეოდა. "ევროპის სახალხო პარტიის" ერთ-ერთ განცხადებაში ნათქვამია, რომ საქართველო ჭეშმარიტად დემოკრატიული და ევროპული სახელმწიფო გახდა. ჯერ კიდევ 1992-93 წლებში იგი საქართველოს მიმართ რუსულ აგრესიას გმობდა. მისი ხელმძღვანელობით ევროპის სახალხო პარტიას არერთხელ დაუყენებია და გაუტანია საქართველოს მხარდამჭერი რეზოლუციები.

მარტენსი წლების მანძილზე საქართველოს სუვერენიტეტის, ტერიტორიული მთლიანობისა და ევროატლანტიკური ინტეგრაციის აქტიური მხარდამჭერი იყო.

ევროპის სახალხო პარტიის თავმჯდომარე ვილფრედ მარტენსი გასული საუკუნის 80-იან წლებში და 90-იანების დასაწყისში ბელგიის მთავრობის სათავეში იყო. იგი ასევე ევროპული სახალხო პარტიის დამფუძნებელია და ევროკავშირის ქრისტიან დემოკრატიულ კოალიციას თითქმის ორი დეკადის მანძილზე ხელმძღვანელობდა.

ბელგიის პრემიერმინისტრი და „ევროპის სახალხო პარტიის“ თავმჯდომარე ვილფერდ მარტენსი 1974-91 წლებში ბელგიის პარლამენტის წევრი იყო.

1991-1994 წლებში კი ბელგიის სენატის წევრიც გახლდათ. მარტენსმა 9-ჯერ ჩამოაყალიბა ბელგიის მინისტრთა კაბინეტი, იყო ბელგიის პრემიერ-მინისტრიც, 1979-დან 1981 წლამდე და 1981 წლიდან 1992 წლამდე. პრემიერ-მინისტრობის მეორე ვადაში, მარტენსი ფლამანდიური ქრისტიანულ-დემოკრატიული პარტიის წევრიც გახლდათ.

განათლებით იურისტი, მსოფლიო დონის პოლიტიკოსი, საქართველოს ევროპული მომავალის მხარდამჭერი, ვილფრედ მარტენსი “ევროპის სახალხო პარტიის“ დამფუძნებელიც გახლდათ. იგი პარტიას 1976 წლიდან 1990 წლამდე მეთაურობდა. 1994 წლიდან 1998 წლამდე მარტენსი ევროპარლამენტის წევრი და EPP-ს ფრაქციის თავმჯდომარეც იყო. 2000-2001 წლებში კი ქრისტიან-დემოკრატიული ინტერნაციონალის თავმჯდომარე.

მარტენსი განსაკუთრებული ყურადღებით აკვირდებოდა 2012 წლის საპარლამენტო არჩევნებს. ხელისუფლების მშვიდობიანად გადაბარების შემდგომ კი მარტენსმა აღნიშნა, რომ საქართველომ დემოკრატიული არჩევნების ჩატარება შეძლო:

"მე დიდ ყურადღებას ვაქცევ არჩევნების შედეგებს და ვიწონებ პრეზიდენტ მიხეილ სააკაშვილის საქციელს, რომელმაც პატივი სცა ხალხის არჩევანს და ხელი შეუწყო ძალაუფლების მშვიდობიან გადაცემას. მომავალი ხუთი წლის განმავლობაში, დემოკრატიული დებატები გაიმართება არა ქუჩებში, არამედ პარლამენტში. არ არის გასაკვირი, ეუთო-ს განცხადება, რომ ‘”ქართველმა ხალხმა თავისუფლად გამოხატა თავისი ნება და არ დაფიქსირებულა სერიოზული დარღვევები არჩევნების დღეს”, - განაცხადა მარტენსმა.

მარტენსი მუდამ აღნიშნავდა, რომ მას აქვს სურვილი, რომ საქართველომ განაგრძოს ევროპისკენ სვლა და არჩეულ კურსს არ გადაუხვიოს.

მიმდინარე წლის 10 ოქტომბერს, 77 წლის ასაკში ვილფრედ მარტენსი გარდაიცვალა. მარტენსი დღეს დაკრძალეს. ცერემონიალს სხვადასხვა ქვეყნების ლიდერები ესწრებოდნენ. დაკრძალვის ცერემონიალი ქალაქ გენტში, წმინდა ბააფის საკათედრო ტაძარში გაიმართა.