ინფორმაციის სანდოობის შესახებ დასკვნები უნდა გამოიტანოს ხალხმა და არა ტექნოლოგიურმა კომპანიებმა, - განაცხადა სოციალურ ქსელ Facebook-ის დამაარსებელმა და ხელმძღვანელმა მარკ ცუკერბერგმა ვაშინგტონში, ჯორჯთაუნის უნივერსიტეტში გამოსვლისას.

იგი იცავს მის პლატფორმაზე პოლიტიკური რეკლამის განთავსების უფლებას და აცხადებს, რომ გაურკვეველია, თუ რა სახის რეკლამას შეიძლება ეწოდოს პოლიტიკური.

"ხშირად ესა თუ ის რეკლამა დაკავშირებულია გარკვეულ პრობლემებთან და არა პირდაპირ არჩევნებთან. უნდა ავკრძალოთ რეკლამა, რომელიც ეხება ჯანდაცვის პრობლემებს, მიგრაციას, ან ქალთა უფლებების დაცვას? ამ საკითხებს პოლიტიკოსებიც ხშირად განიხილავენ. თუნდაც რომ ავკრძალოთ ამ კუთხით პოლიტიკოსების რეკლამირება, გონივრული იქნება, რომ ზოგად პოლიტიკურ საკითხებზე აზრის გამოთქმის უფლება მივანიჭოთ ყველას კანდიდატების გარდა?" - აცხადებს ცუკერბერგი.