სააკაშვილს მოელის უმძიმეს კითხვებზე პასუხის გაცემა ჩემი ძმის მკვლელობის გარშემო, აღნიშნულის შესახებ ყოფილი პრემიერმინისტრის ზურაბ ჟვანიას ძმა დეპუტატი გიორგი ჟვანია საუბრობს. "დადგება ბევრი ადამიანის პასუხისმგებლობის საკითხი სააკაშვილი, მერაბიშვილი და ადეიშვილი ხელს აფარებდნენ მკვლელებს და ეს არის სიბინძურე. ის თემა რომლის წამოწევასაც სააკაშვილი შეეცადა ასევე მათი შეთითხნილია და ესეც სისხლის სამართლის დანაშაულია", - აცხადებს გოგლა ჟვანია. 

იგი სააკაშვილის გუშინ გაკეთებულ განცხადებასაც გამოეხმაურა. "მინდა გამოვეხმაურო სააკაშვილის გუშინდელ განცხადებას ჩემი ძმის გადაცვალებასთან დაკავშირებით, რომელშიც იგი შეეცადა გარდაცვლილი ადამიანის ღირსების შელახვას. აქამდე ამ სამუშაოს ასრულებდნენ სააკაშვილის უახლოესი გარემოცვის წევრები და მის დაქვემდებარებაში მყოფი სპეცსამსახურები. ამჟამად მას აღარც ეს სამსახურები ჰყავს, გარემოცვაც შეუთხელდა, მხოლოდ თავისი უზნეობა და არაკაცობაღა შემორჩა, რასაც დაემატა ცხოველური შიში მოახლოებული პასუხისმგებლობისა თავისი მრავალწლიანი დანაშაულებრივი მოღვაწეობის გამო. მათ შორის, სააკაშვილს მოელის უმძიმეს კითხვებზე პასუხის გაცემა ჩემი ძმის მკვლელობის გარშემო. მან ხომ ყველაზე უკეთ იცის, რა დანაშაული აქვს ყოველ კონკრეტულ შემთხვევაში ჩადენილი, ამიტომაც შეშინებული და აგონიაში მყოფი აკეთებს უბადრუკ განცხადებებს. ეს ყველაფერი დასასრულისკენ მიდის და უახლოეს თვეებში საზოგადოება თავისი პრემიერ-მინისტრის დაღუპვასთან დაკავშირებულ ყველა კითხვაზე მიიღებს ამომწურავ პასუხს, ხოლო სააკაშვილი და მისი ხროვა კი პასუხს აგებენ მათ მიერ ჩადენილ ყველა დანაშაულზე", - აცხადებს გიორგი ჟვანია.

შეგახსენებთ, რომ საქართველოს პრეზიდენტის, მიხეილ სააკაშვილის განცხადებით, ჟვანიას გარდაცვალებაზე დასკვნა ფედერალურმა ბიურომ უკვე დადო. "მისი გარდაცვალების გამოძიებაზე გამოძიების ფედერალურმა ბიურომ დადო დასკვნა, რომლითაც ჩემთვის ყველა კითხვას გაეცა პასუხი", - აღნიშნა სააკაშვილმა.