შსს: ხაშურის მომხდარ მკვლელობაში ბრალდებულ მამაკაცის მიმართ შემაკავებელი ორდერი გამოცემული არ ყოფილა

სამართალი - 20:24, 12 Oct, 2019

1086

შინაგან საქმეთა სამინისტროში აცხადებენ, რომ ხაშურში ახალგაზრდა ქალის მკვლელობასთან დაკავშირებით გავრცელებული ინფორმაცია, იმის შესახებ რომ დაკავებულის მიმართ შემაკავებელი ორდერი იყო გამოცემული, სიმართლეს არ შეესაბამება.

უწყებაში ამბობენ, რომ გარდაცვლილის მიმართ შესაძლო ძალადობის თაობაზე 2012 წლის შემდეგ რაიმე მიმართვა/განცხადება პოლიციის დანაყოფებში არ ფიქსირდება.

შესაბამისად, პოლიციის მხრიდან არ მომხდარა ძალადობის განმეორების რისკების შეფასება, რომელიც 2018 წლის პირველი სექტემბრიდან მოქმედებს.
ცნობისთვის, გარდაცვლილის მეზობლებზე დაყრდნობით რამდენიმე მედიასაშუალებამ გაავრცელა ინფორმაცია, რომ ბრალდებულის მხრიდან ადრეც ჰქონდა ნათია გოგალაძის მიმართ თავდასხმას ადგილი და ამის შესახებ პოლიციაც იყო ინფორმირებული.

შეგახსენებთ, ტრაგედია ხაშურში გუშინ დატრიალდა. ყოფილმა ქმარმა ახალგაზრდა გოგოს მძიმე დაზიანებები მიაყენა. 30 წლის ნათია გოგალაძე საავადმყოფოში მიყვანიდან რამდენიმე საათში გარდაიცვალა. მკვლელობაში ბრალდებულის ირაკლი დეკანოიძის დაკავების შესახებ ინფორმაცია შსს-მ დღეს გაავრცელა.

შინაგან საქმეთა სამინისტროს ცნობით, წარსულში ნასამართლევმა მამაკაცმა ყოფილ მეუღლეს ავტომატური ცეცხლსასროლი იარაღის კონდახით თავის არეში სასიკვდილო დაზიანებები მიაყენა და შემთხვევის ადგილიდან მიიმალა.

ჩადენილი დანაშაული 13-დან 17 წლამდე ვადით თავისუფლების აღკვეთას ითვალისწინებს.