არასამთავრობო ორგანიზაცია „ადამიანი, კანონი, თავისუფლება“ სასჯელაღსრულების დაწესებულებებში არჩევნების მიმდინარეობის პროცესს დააკვირდება

საზოგადოება - 15:49, 18 Oct, 2013

790

არასამთავრობო ორგანიზაციაში „ადამიანი, კანონი, თავისუფლება“ აცხადებენ, რომ
მათი მიზანია დააკვირდნენ საარჩევნო პროცესების მიმდინარეობას
სასჯელაღსრულების დაწესებულებებში.

მოქმედი კანონმდებლობის თანახმად, 2013 წლის 27 ოქტომბრის არჩევნებში
მონაწილეობის უფლება აქვს საქართველოს ყველა ქმედუნარიან მოქალაქეს, რომელიც
იმყოფება წინასწარ პატიმრობაში ან სასამართლოს განაჩენით იმყოფება
პატიმრობის/თავისუფლების აღკვეთის დაწესებულებაში, სასჯელს იხდის ნაკლებად
მძიმე დანაშაულისთვის და მისჯილი აქვს 5 წელზე ნაკლები.

გამომდინარე იქიდან, რომ ამ დროისთვის უცნობია რომელ დაწესებულებებში
გაიხსნება საარჩევნო უბნები, მას შემდეგ, რაც სასჯელაღსრულების, პრობაციისა და
იურიდიული დახმარების საკითხთა სამინისტრო გამოაქვეყნებს მონაცემებს,
ორგანიზაცია „ადამიანი, კანონი, თავისუფლება“ მიმართავს ოფიციალური წერილით
რომელ უბანზე დააკვირდება არჩევნების მიმდინარეობას.

*გიორგი ჭულუხაძე (ორგანიზაციის თავმჯდომარე)* – „პირველი საპრეზიდენტო
არჩევნებია, როდესაც მათ შეუძლიათ მიიღონ მონაწილეობა და დააფიქსირონ თავიანთი
არჩევანი. მოგეხსენებათ, რომ გასულ საპარლამენტო არჩევნებში პირველად მოხდა
მათი ჩართვა საარჩევნო პროცესში, რასაც განსაკუთრებული აზრთა სხვადასხვაობა
მოჰყვა. 27 ოქტომბრის საპრეზიდენტო არჩევნები წარმოადგენს განსაკუთრებულ
მოვლენას საქართველოს ისტორიაში, ვინაიდან ახალ პრეზიდენტს რადიკალურად
განსხვავებული უფლებამოსილებები ექნება სხვა წინამორბედებისაგან. ამასთანავე,
ქვეყნისთვის განსაკუთრებით მნიშვნელოვანია სამართლიანი და დემოკრატიული
არჩევნების ჩატარება, რათა ქვეყანამ გააგრძელოს სვლა დასავლეთისკენ და
დემოკრატიული ღირებულელებისკენ, რათა გახდეს ნატოს და ევროკავშირში
სრულფასოვანი წევრი. სწორედ ამ შედეგის მისაღწევად ჩვენი ორგანიზაცია
განსაკუთრებით დიდი ყურადღებით დააკვირდება არჩევნების მიმდინარეობის პროცესს
და საზოგადოებას მიაწვდის სრულყოფილ და ობიექტურ ინფორმაციას“.