მუმლაძის დიდი ხნით ადრე დაგეგმილი მკვლელობა და შეცვლილი გვარ-სახელები - პოლიციელების მონაწილეობით ჩადენილი დანაშაულის დეტალები

სამართალი - 15:09, 07 Oct, 2019

7790

35 წლის დავით მუმლაძის მკვლელობის საქმის სკანდალური გაგრძელება - საქმის მასალების თანახმად, მიმდინარე წლის პირველ ოქტომბერს ახალგაზრდა კაცი, შინაგან საქმეთა სამინისტროს მოქმედმა თანამშრომლებმა - მიხეილ ღუბიანურმა და დავით მიროტაძემ ყოფილ სამართალდამცავთან, დიტო დუღაშვილთან ერთად მძევლად აიყვანეს და ლიკვიდაციის მიზნით 1982 წელს დაბადებულ, წარსულში ნასამართლევ გ.ა.-ს გადასცეს, რომელიც ე.წ. კრიმინალური ავტორიტეტია.

რაც შეეხება კიდევ ერთ დაკავებულს, გიორგი გეთაშვილს, მას გამოძიება ცრუ ჩვენების მიცემას ედავება.

ჩვენი ინფორმაციით, პოლიცია ეძებს სასტიკი მკვლელობის კიდევ ერთ ფიგურანტს, რომლის ვინაობასაც ბრალდებულები არ ასახელებენ.

როგორც ჩანს მუმლაძის მკვლელობა დიდი ხნით ადრე დაიგეგმა და ამ ეჭვის საფუძველს მკვლელობაში მონაწილე და ფიგურანტი პირების მიერ გვარ-სახელების შეცვლა აძლიერებს.

კერძოდ, მოკლულ დავით მუმლაძეს ვინაობა შეცვლილი ჰქონდა, მას რუსთავში ყველა ზურა დადეშელის სახელით იცნობს. ხოლო გიორგი გეთაშვილის რეალური სახელი გიორგი ოქრუაშვილია.

გვარის შეცვლა სავარაუდოდ წარსულში არსებული დაპირისპირების შედეგია.

პირველ ოქტომბერს განვითარებულ მოვლენებს რომ დავუბრუნდეთ, არსებული ინფორმაციით, ცრუ ჩვენების მიცემისთვის დაკავებულმა გიორგი გეთაშვილმა საკუთარი საცხოვრებელი სახლიდან წამოიყვანა დავით მუმლაძე, ამის შემდეგ პოლიციელებმა გააჩერეს აღნიშნული ავტომობილი, საკუთარ მანქანაში გადაისვეს 35 წლის ახალგაზრდა და მიიყვენეს რუსთავში, მტკვრის ნაპირზე, სადაც მათ ე.წ. კრიმინალურ ავტორიტეტები ელოდებოდნენ.

35 წლის დავით მუმლაძეს ოჯახი 1 ოქტომბრიდან ეძებდა. მისი ცხედარი საბოლოოდ 5 ოქტომბერს, რუსთავში მდინარე მტკვარმა გამორიყა.
მამაკაცს 30 ზე მეტი ჭრილობა დანით აქვს მიყენებული.