შსს "ქართული ოცნების" დეპუტატზე, რომელსაც სექსუალურ ძალადობაში ადანაშაულებენ ინფორმაციას ავრცელებს

სამართალი - 10:04, 07 Oct, 2019

5441

შინაგან საქმეთა სამინისტრო თბილისის საკრებულოს დეპუტატის მიერ მისივე თანამშრომლის მიმართ განხორციელებული სავარაუდო სექსუალური და ფიზიკური ძალადობის შესახებ ინფორმაციას ავრცელებს.

„112-ში შეტყობინების შესვლის შემდეგ, სამართალდამცველები გამოცხადდნენ მითითებულ მისამართზე. თავდაპირველად ზარის ინიციატორსა და მის დედას გავესაუბრეთ. შემდგომ ისინი გადავიყვანეთ პოლიციის განყოფილებაში გამოკითხვის მიზნით. მოცემულ სსს-ზე ჩატარდა ყველა შესაბამისი საპროცესო და საგამოძიებო მოქმედება კერძოდ, დათვალიერდა შემთხვევის ადგილი, მოწმის სახით გამოიკითხნენ საქმესთან შემხებლობაში მყოფი პირები, დანიშნულია ყველა შესაბამისი ექსპერტიზა. აქტიური ოპერატიულ-სამძებრო და საგამოძიებო მოქმედებები სსს-ზე ობიექტური ჭეშმარიტების დადგენის მიზნით მიმდინარეობს" - აღნიშნულია განცხადებაში.

თბილისის საკრებულოს დეპუტატს, ილია ჯიშკარიანს მისი ბიუროს თანამშრომელი თამთა თოდაძე სექსუალურ და ფიზიკურ ძალადობაში ადანაშაულებს. პროკურატურას თოდაძისთვის დაზარალებულის სტატუსი ამ დრომდე არ მიუნიჭებია, ბრალი არ აქვს წარდგენილი არც ილია ჯიშკარიანს.

ჯიშკარიანის თანაშემწეს ძალადობის კვალი მომხდარიდან ერთი კვირის თავზეც ეტყობა და მას სამხარაულის ექსპერტიზის დასკვნაც ადასტურებს.

თოდაძე აცხადებს, რომ აღნიშნულ ინციდენტს სამართალდამცავი ორგანოების მხრიდან სათანადო რეაგირება არ მოჰყოლია, არ მოხდა ილია ჯიშკარიანის დროულად დაკითხვა და იგი მხოლოდ მაშინ დაიბარეს გამოკითხვაზე, როდესაც საქმე გასაჯაროვდა და უშუალოდ საზოგადოებამ მოითხოვა მისთვის ბრალის წაყენება.

ილია ჯიშკარიანი გაუპატიურების მცდელობას უარყოფს და ყოფილ თანაშემწეს შანტაჟშიც კი ადანაშაულებს.

თამთა თოდაძის ინტერესებს არასამთავრობო ორგანიზაცია "საფარი" იცავს.