"ექსტადიციისთვის საჭირო დოკუმენტების გადასაგზავნად გვაქვს 40 დღე, მაგრამ ამდენი დღე ალბათ, არ დაგვჭირდება, დოკუმენტების სისტემიზაციაში მოყვანა უახლოეს დროში მოხდება. ფრანგულ მხარეს წარედგინება დოკუმენტები, რომელიც კეზერაშვილის ბრალდებასთან არის დაკავშირებული. როდესაც პირის ექსტრადიციის გადაწყვეტილების მიღებაზე მსჯელობს სასამართლო, საჭიროა მას წარედგინოს ბრალდების მხარდამჭერი მტკიცებულებები", - განაცხადა კბილაშვილმა.

შეგახსენებთ, რომ დავით კეზერაშვილს ბრალად ედება საქართველოს სისხლის სამართლის კოდექსის 338-ე მუხლის მე-2 ნაწილის "ა" ქვეპუნქტით, 338-ე მუხლის მე-3 ნაწილის "ე"ქვეპუნქტით, 214-ე მუხლის მე-2 და მე-6 ნაწილებით, 194-ე მუხლის მე-3 ნაწილის "ა" და "გ" ქვეპუნქტებით და 182-ე მუხლის მე-3 ნაწილის "ა" და "ბ" ქვეპუნქტებით გათვალისწინებული დანაშაულების ჩადენა, რაც გულისხმობს სახელმწიფო პოლიტიკური თანამდებობის პირის მიერ განსაკუთრებით დიდი რაოდენობით ქრთამის აღებას, ორგანიზებული ჯგუფის მიერ საბაჟო წესების დარღვევას, რამაც განსაკუთრებით დიდი რაოდენობით ზარალი გამოიწვია, ორგანიზებული ჯგუფის მიერ განსაკუთრებით დიდი რაოდენობით ფულის გათეთრებას და უკანონო შემოსავლის მიღებას, ორგანიზებული ჯგუფის მიერ ჩადენილ დიდი რაოდენობით მითვისება/გაფლანგვას.