თბილისს 100 ახალი ავტობუსი მოემსახურება

საზოგადოება - 16:13, 17 Oct, 2013

2390

უახლოეს მომავალში ეკოლოგიური პრობლემის გადასაჭრელად მდინარე მტკვარზე ახალი პროექტი განხორციელდება. კომპანია "ჯორჯიან უოთერ ენდ ფაუერი" მდინარეში ჩამდინარე წყლების გაწმენდაზე მუშაობს. საკანალიზაციო სისტემიდან მტკვარში ჩამდინარე წყლები ერთ მილსადენში მოექცევა, რომელიც გარდაბანში სპეციალურ ნაგებობამდე მივა.
„მომავალ წელს თბილისის არცერთ წერტილში არცერთი მონაკვეთიდან არ იქნება კანალიზაციის პირდაპირი ჩადინება მტკვარში. რეალურად ჩვენ თბილისის მონაკვეთს გავასუფთავებთ. ამ კომპანიის შემდეგი ვალდებულებაა, 2018 წლისათვის გარდაბნის საწმენდი ნაგებობის რეკონსტრუქცია. ჩვენ დაგვრჩება კიდევ ერთი პრობლემა, რომელიც უკვე ცენტრალურმა მთავრობამ, ჟინვალის მუნიციპალიტეტთან უნდა მოაგვაროს, არაგვის ხეობაში, ჟინვალში პრაქტიკულად არ არის კანალიზაცია და იქაც არაგვში ჩადინება ხდება და ის ირიბად ეხება თბილისსაც. მომავალ წელს, როცა ეს სამუშაოები დასრულდება ბიოლოგიური და ბაქტერიოლოგიური პრობლემები დედაქალაში, მოგვარდება“, - განაცხადა უგულავამ.
ამასთანავე, თბილისის მერია 2014 წელს მუნიციპალური პარკის განახლებას აპირებს. პროექტის განხორციელების შემდეგ, ქალაქში ევროპული სტანდარტის 100 ავტობუსი იმოძრავებს. ტრანსპორტი ეკოლოგიურად სუფთა, კომფორტული და შეზღუდული შესაძლებლობების მქონე პირებზეც ადაპტირებული იქნება. ცნობილია, რომ ავტობუსებში ვიდეო თვალიც იქნება დამონტაჟებული:„400 ათასზე მეტი მგზავრი მგზავრობს ყოველდღიურად მარტო ავტობუსებით, ამიტომ ძალიან მნიშვნელოვანია, რომ თბილისელებს ჰქონდეთ კომფორტულად გადაადგილების უფლება. ახალ ავტობუსებს უნარშეზღუდულთა ადვილი მიღების შესაძლებლობა ექნება. ეს არის ავტობუსები, რომლებიც ძალიან კომფორტულია მძღოლისთვის და მგზავრებისთვის“, - განაცხადა გიგი უგულავამ.