მერაბიშვილის გამოუცხადებლობის მოტივით, სასამართლო პროცესი გადაიდო

სამართალი - 15:05, 17 Oct, 2013

1934

ქუთაისის საქალაქო სასამართლოს მოსამართლის ნათია ბარბაქაძის გადაწყვეტილებით ვანო მერაბიშვილის და ზურაბ ჭიაბერაშვილის სასამართლო პროცესი იმ მოტივით გადაიდო, რომ დღეს ბრალდებული ვანო მერაბიშვილი პროცესზე არ გამოცხადდა. პროკურორი ნათია სონღულაშვილი იმედოვნებს, რომ მომდევნო პროცესზე მერაბიშვილი გამოცხადდება. „მიუხედავად იმისა, რომ საპროცესო კანონმდებლობა არ ითვალისწინებს მხარის დავალდებულებას წინასწარ შეატყობინოს მეორე მხარეს დასაკითხი პირები. გასულ პროცესზე გამოვიჩინეთ კეთილი ნება და დავპირდით, რომ გადავცემდით დასაკითხ სიას. ჩემი პირობა ნამდვილად შესრულდა, პირადად მე თვითონ ვესაუბრე დამცველ ადვოკატს და ჩავაწერინე ყველა იმ მოწმის სახელი და გვარი, რომლის დაკითხვას დღეს ვაპირებდით. დღევანდელ პროცესზეც გავაჟღერე იმ პირთა სია, რომელთა გამოძახებას ჩვენ შემდგომ ექვს პროცესზე ვაპირებთ. ვიმედოვნებ, რომ დაცვის მხარე აღნიშნულ საკითხზე რაიმე განცხადებებს აწი აღარ გააკეთებს,“-აღნიშნა ნათია სონღულაშვილმა. ბრალდებულ ზურაბ ჭიაბერაშვილის განცხადებით, ვანო მერაბიშვილი სასამართლო პროცეს, პროკურატურის მხრიდან პირობის დარღვევის გამომო არ ესწრებოდა. „მერაბიშვილის ადვოკატს პროკურატურამ საღამოს ექვს საათზე გააცნო დასაკითხი ადამიანების ვიანობა. მან ვერ მოასწრო ციხეზე ვანოსტან მისვლა და ინფორმაციის გაცნობა. სწორედ ამიტომ არ იმყოფებოდა ვანო მერაბიშვილი აქ. დღეს პროკურატურამ გადაწყვიტა, რომ გამოავლენს კეთილ ნებას და ჩვენ მოგვეცემა საშუალება სრულფასოვნად მოვემზადოთ შემდეგი პროცესისთვის,“-განაცხადა ზურაბ ჭიაბერაშვილმა. ვანო მერაბიშვილის ადვოკატის გიორგი ჩივიაშვილის თქმით, კმაყოფილი არის რომ სასამართლო პროცესი გადაიდო, რადგან უფრო კარგად მოემზადება მომდევნო სასამართლო პროცესისთვის. „დღეს ჩვენ გვითხრეს, თუ რომელი რაიონებიდან აპირებენ მოწმეთა დაკითხვას. შესაბამისად ვიტოვებთ იმედს, რომ გააგრძელებენ ჩვენთან თანამშრომლობას და წინასწარ გაგვაცნობენ მოწმეთა სიას. თუ კი ისევ ჩაგვაყენებენ იმ პოზიციაში, რომ ჩვენ არ ვიქნებით შეჯიბრითობის პრინციპში თანაბარ პირობებში ბრალდებასთან, ისევ დავაყენებთ შუამდგომლობას ბრალდებასთან,“-განმარტა გიორგი ჩივიაშვილმა. ქუთაისის საქალაქო სასამართლოში ვანო მერაბიშვილის და ზურაბ ჭიაბერაშვილის პროცესი 2013 წლის 21 ოქტომბერს 13:00 განახლდება.