საერთაშორისო რესპუბლიკური ინსტიტუტის (IRI) დელეგაცია საქართველოს საპრეზიდენტო არჩევნებს დააკვირდება

საზოგადოება - 14:15, 17 Oct, 2013

1393

საერთაშორისო რესპუბლიკური ინსტიტუტი – IRI (International Republican Institute) დააკვირდება 2013 წლის 27 ოქტომბრის საპრეზიდენტო არჩევნებს საქართველოში. ორგანიზაციის დელეგატები ჩავლენ საქართველოს სხვადასხვა რეგიონებში და დააკვირდებიან ხმის მიცემისა და ხმების დათვლის პროცედურებს საარჩევნო უბნებზე. ხმის მიცემის დასრულების შემდეგ, ორგანიზაცია გააკეთებს განცხადებას სადამკვირვებლო მისიის მონიტორინგის შედეგებთან დაკავშირებით. საერთაშორისო რესპუბლიკური ინსტიტუტის დელეგაციას გაუძღვებიან კონგრესმენი ჯონ შიმკუსი (IL-15) და IRI-ის დირექტორთა საბჭოს თავმჯდომარის მოადგილე, გაეროს ყოფილი ელჩი და პრეზიდენტის ყოფილი საგანგებო დესპანი სუდანში - რიჩარდ უილიამსონი. არჩევნებამდე დელეგაციის წევრები შეხვდებიან ამერიკის საელჩოს წარმომადგენლებს საქართველოში, პრეზიდენტობის კანდიდატებისა და საარჩევნო ადმინისტრაციის წარმომადგენლებს. ასევე, ისინი გაეცნობიან საერთაშორისო დამკვირვებლების უფლებებსა და პასუხისმგებლობებს, საქართველოს საარჩევნო კანონმდებლობას. შემდეგ კი დელეგატები გადანაწილდებიან მთელი ქვეყნის მასშტაბით, სადაც დააკვირდებიან საარჩევნო უბნებს, შეაფასებენ საქართველოს საარჩევნო სისტემის ძლიერ და სუსტ მხარეებს - კამპანიის რეგულაციებს, ხმის მიცემის, ხმის დათვლისა და შედეგების ცესკო–ში გადაცემის პროცედურებს. 1983 წლიდან დღემდე, საერთაშორისო რესპუბლიკური ინსტიტუტი დააკვირდა 150-ზე მეტ არჩევნებს მსოფლიოს 46 ქვეყანაში, მათ შორის, 2012 წლის ოქტომბრის საპარლამენტო, 2008 წლის იანვრის საპრეზიდენტო და 2003 წლის ნოემბრის საპარლამენტო არჩევნებს საქართველოში.