ვანო მერაბიშვილის ადვოკატი პროკურატურას მიმართავს. გიორგი ჩივიაშვილი ბრალდების მხარეს სთხოვს, ერთი დღით ადრე გააცნოს იმ რამდენიმე მოწმის ვინაობა, რომლებიც ხვალინდელ პროცესზე უნდა დაიკითხონ.

უფლებადამცველის განმარტებით, თუ 3969 მოწმეს შორის, ხვალ დასაკითხი მოწმეების ვინაობა ცნობილი არ გახდება, მაშინ ის სხდომაზე შეჯიბრებითობის პრინციპის დარღვევას პროგნოზირებს.

„ჩვენ წინა პროცესზე შევთანხმდით, რომ პროკურატურა წინასწარ გვეტყოდა იმ მოწმეების ვინაობას, რომლის დაკითხვასაც განახორციელებდა შემდეგ პროცესზე, პროკურატურა როგორც ჩანს საკუთარ დაპირებას არ ასრულებს, ჯერ კიდევ არ ვიცით ვის დაკითხვას აპირებს პროკურატურა. შეუძლებელია 3969 მოწმის წინასწარ ძიებაში მიცემული ჩვენების ზეპირად ცოდნა, შესაბამისად, პრაქტიკულად, დაცვა რჩება ისეთ სიტუაციაში, როდესაც მთლიანად დარღვეულია შეჯიბრებითობის პრინციპი, წარმოუდგენელია, ჩვენ ვიყოთ ისევე მზად, როგორც იქნება ბრალდების მხარე მომზადებული ამ პროცესისთვის“, - განაცხადა გიორგი ჩივიაშვილმა.