არასრულწლოვან თათია ფხაკაძის ბიძამ გოგა ფხაკაძე, რომელიც რძალს შვილის გატაცებაში ადანაშაულებს, „ნიუპოსტს“ უთხრა, რომ ორი დღის წინ მისი რძალი თამარ ნაზღაიძე მეუღლეს ტელეფონით დაუკავშირდა და მამას ბავშვი დაალაპარაკა.

მისი თქმით, როგორც მამას გოგონამ განუცხდა, იტალიაში იგი კარგ პირობებში იმყოფება და სკოლაში სწავლობს. „როდესაც ჟურნალისტებმა ეს საქმე გაახმაურეს, ჩვენი ვარაუდით, ჩემს რძალს მიეწოდა ინფორმაცია, რომ ბავშვს ვეძებდით და იძულებული გახდა, რომ ჩვენთვის ტელეფონით დაერეკა.

ორი დღის უკან ღამის საათებში ჩემ ძმას მისმა მეუღლემ ტელეფონით დაურეკა, მოიკითხა რას შვრები, როგორ ხარო. მერე ბავშვი დაალაპარაკა, მამამის უთხრა გოგონამ, რომ კარგად ვარ და მენატრებით ყველანიო. როგორც ბავშვმა გვითხრა, სკოლაში სწავლობს და იტალიურ ენას ეუფლება.

პირველი ნაბიჯები რა თქმა უნდა უკვე დაიძრა და ჩვენი მოთხოვნა სწორედ ეს იყო, რომ ბავშვს მამასთან სატელეფონო კავშირი ჰქონოდა. ჩემმა რძალმა მეუღლეს უთხრა, რომ საბუთებს ვაკეთებ და ვფიქრობ ბავშვი საახალწლოდ საქართველოში ჩამოვიყვანოო,“-განუცხადა „ნიუპოსტს“ გოგა ფხაკაძემ.

შეგახსენებთ, რომ 2013 წლის 16 მარტს არასრულწლოვანი თათია ფხაკაძე დედამ თამარ ნაზღაიძემ მამის თანხმობით იტალიაში იმ პირობით წაიყვანა, რომ ერთ თვეში ბავშვს საქართველოში დააბრუნებდა, თუმცა თამარ ნაზღაიძეს თათია ფხაკაძე საქართველოში დღემდე არ დაუბრუნებია.

გოგონას ბებია და ბიძა გოგა ფხაკაძე რძალს შვილის გატაცებაში ადანაშაულებენ. ნოდარ ჯოჯუა, „ნიუპოსტი“, ქუთაისი.