ექსპერტები, ელენე ხოშტარია და სერგი კაპანაძე, საქართველოს პრემიერ-მინისტრს, ბიძინა ივანიშვილს განცხადებით პასუხობენ. აღნიშნული განცხადება სერგი კაპანაძემ „ფეისბუქის“ საკუთარ გვერდზე განათავსა. განცხადებაში აღნიშნულია, რომ „საზოგადოებრივი მაუწყებლისთვის“ მიცემულ ექსკლუზიურ ინტერვიუში, პრემიერი აღნიშნული ექსპერტებისადმი კვლავ შეურაცხმყოფელი ფრაზებით გამოირჩეოდა:

„ჩვენ კვლავ არ ვაპირებთ, ვუპასუხოთ პრემიერ-მინისტრს მისთვის დამახასიათებელ "რიტორიკულ სტილში" თუმცა, გვსურს განსაკუთრებით მივაპყროთ საზოგადოების ყურადღება რამდენიმე მნიშვნელოვან საკითხს.

ის საკითხები, რომლებზეც ჩვენ გამოვთქვამთ კრიტიკულ მოსაზრებებს, რეკომენდაციებს, ან/და შენიშვნებს, იქნება ეს ეკონომიკა, რუსეთთან ურთიერთობები, თუ სხვა, იმ თემებს მიეკუთვნება, რომლებზეც დღეს ქვეყანაში მძაფრი დისკუსია მიმდინარეობს. ჩვენი კითხვები ეკონომიკის მდგომარეობასთან დაკავშირებით ეფუძნება საერთაშორისო საფინანსო ორგანიზაციების შეფასებებს, გავლენიანი გამოცემების პუბლიკაციებს და სახელმწიფო უწყებების მიერ გავრცელებულ ოფიციალურ სტატისტიკურ მონაცემებს. საგანგაშოა, რომ ეს ციფრები, ფაქტები და შეფასებები სათანადოდ არ აღიქმება პრემიერ-მინისტრის მიერ. ისიც სამწუხაროა, რომ მის მიერ მოყვანილი მთელი რიგი ფაქტებისა (მაგალითად, რეგიონში ერთ სულ მოსახლეზე მთლიანი შიდა პროდუქტის მხრივ საქართველოს მდგომარეობა) უბრალოდ მცდარია. ამიტომ, ჩვენს მოვალეობად მივიჩნევთ, მივუთითოთ პრემიერ-მინისტრს, როდესაც ვხედავთ, რომ მისი ანალიზი არასწორ ფაქტებს ეფუძნება. მიგვაჩნია, რომ საჯარო პოლიტიკის ანალიზით დაკავებული არასამთავრობო ორგანიზაციების პირდაპირი მოვალეობაა მსგავს განცხადებებზე და შეფასებებზე რეაგირება.

გვსურს, ხაზი გავუსვათ, რომ მთავრობის მეთაურის ამგვარი განცხადებების მიუხედავად, არ ვაპირებთ არც იმ საკითხებზე გაჩუმებას, რომლებზეც ვთვლით, რომ აუცილებელია ხმამაღლა საუბარი და არც იმ საკითხების უსაფუძვლო კრიტიკას, სადაც მთავრობა კრიტიკას არ იმსახურებს. გვინდა შევახსენოთ პრემიერს, რომ ფაქტებისა და ობიექტურობისადმი ჩვენი დამოკიდებულების ყველაზე კარგი საზომი არის ჩვენს მიერ შექმნილი ვებ გვერდი -www.factcheck.ge სადაც ჩვენ ვაანალიზებთ მთლიანად პოლიტიკური სპექტრის, როგორც მთავრობის, ისე ოპოზიციის მიერ გაკეთებული განცხადებების ფაქტობრივ სიზუსტეს და ვცდილობთ ფაქტებზე დაყრდნობით ობიექტური ინფორმაცია მივაწოდოთ საზოგადოებას. გუშინდელი განცხადების შემდეგ დაგვრჩა შთაბეჭდილება, რომ ჩვენმა კრიტიკამ იმდენად მიიპყრო პრემიერ-მინისტრის ყურადღება, რომ შემოწმდა ჩვენი წარსული და გვქონდა თუ არა ჩადენილი დანაშაულებრივი ქმედებები. საგანგაშოდ მიგვაჩნია ასეთი მიდგომა, რომლის მიხედვითაც, შეიძლება შეარჩიო კრიტიკულად განწყობილი არასამთავრობო ორგანიზაციების წარმომადგენლები და შერჩევითად შეამოწმო, აქვთ თუ არა მათ ჩადენილი დანაშაული. ამგვარი დამოკიდებულება კრიტიკის მიმართ, ჩვენი აზრით, აჩვენებს დემოკრატიულ ღირებულებებთან დაკავშირებულ პრობლემებს", - ნათქვამია განცხადებაში.