გელა გელაშვილი, რომელიც დვანში გამართულ ანტისაოკუპაციო აქციაში "ფეისბუქის" სხვა მომხმარებლებთან ერთად მონაწილეობდა, წერს, რომ დვანში ერთერთ ქორწილში მოხვდნენ, სადაც დვანელებმა გადასცეს თხოვნა, 350 საქართველოს სახელმწიფო დროშის გამოგზავნის შესახებ, ასევე, მადლობის წერილი გაატანეს თბილისის მერთან გიგი უგულავასთან.

გელა გელაშვილმა წერილის ასლიც გამოაქვეყნა.

"დვანში გახლდით გუშინ. დვანამდე რამოდენიმე სოფელი უნდა გაიარო. მათ შორის დირბი (ცნობილი "დირბულას" სამშობლო). სახლებზე ვერ ვიტყვი, ჩვეულებრივი ქართლურ ყაიდაზე ნაშენი სახლებია, მაგრამ მხედველობის კონცენტრაციას, მხოლოდ ამ სოფლებში გამავალ გზაზე თუ მოვახდენთ, ტიპიური ევროპული ქვეყანაში აღმოაჩენ თავს. შესანიშნავი საფარი, დახაზული, ველოსიპედთათვის განკუთვნილი ზოლები ორივე მხარეს, ყოველ ას მეტრში გადასასვლელები ფეხით მოსიარულეთათვის, უამრავი ლურჯი საგზაო ნიშანი.

მტრის ჯინაზე ქორწილები და ძეობები გრძელდება ამ მართლაც ულამაზეს სოფელში და რომ მეგონა შეშინებული და დაბეჩავებულ დვანელებს ვიხილავდი, ვცდებოდი თურმე. შემართული და პატრიოტი ხალხი დამხვდა ამის ნაცვლად. თუმცა პირველადი მოთხოვნილების პროდუქტების დეფიციტს განიცდიან, არცერთს ამაზე არ დაუჩივლია. ერთ რამეს ითხოვენ მხოლოდ.

ქართულ ეროვნულ დროშებს!!!

350 ქართული დროშა უნდათ, რომ ყოველი სახლის თავზე ააფრიალონ ამაყად.

შევპირდი ჩამოგიტანთ-მეთქი.                                                                                     

წამოსვლისას ქორწილში შეგვიპატიჟეს. უარი ვერ უთხარით და მცირე ხნით შევყევით. იმედიანად არიან.

ერთმა ახალგაზრდამ ასე თქვა, იმი დედა ვატირე, თუ იქითა მხარეს არ აუფრიალო აეგ ჩვენი დროშაო.

მეორემ- გაგებით მეეკიდეთო არა-ო?. გაგებით კიარა, აეგრე გადეეცი ივანიშვილსა, მაგას ხოარა სძმარამსო.

ბოლოს, წამოსვლისას, წერილი დაწერეს გიგი უგულავას სახელზე და გადმომცეს. ბევრი სიკეთე აქვს მაგ კაცს ჩვენთვის გაკეთებულიო.

აქვე დავდებ ამ წერილს...", - წერს გელა გელაშვილი "ფეისბუქზე".