„თვალებს დავთხრი ქარელის გამგებელს“ (ვიდეო)

საზოგადოება - 11:02, 14 Oct, 2013

7038

ქარელში, მუსხელიშვილის ქუჩის მცხოვრებები ადგილობრივ ხელისუფლებას უყურადღებობაში ადანაშაულებენ.

ადგილობრივები ჰყვებიან, რომ დასახლებაში, სადაც ისინი ცხოვრებენ, მოშლილია საკანალიზაციო სისტემა, არ არსებობს საგზაო ინფრასტრუქტურა და ანტისანიტარიის გამო ზაფხულობით საცხოვრებელ სახლებში ქვეწარმავლები შედიან.

როგორც ისინი ,,ნიუპოსტთან'' საუბრისას აცხადებენ, ადგილობრივ ხელისუფლებას დახმარების თხოვნით არაერთხელ მიმართეს, თუმცა გამგეობიდან მათთან ამ დრომდე არავინ გამოჩენილა.

ეთერ უსანეთაშვილი: „მთელი ზაფხულია, გველები გვასევიან, ზამთარი მოდის და ახლა ვირთხებმა შეგვჭამეს... ანტისანიტარიაა მთელს უბანში, კანალიზაციის მილებიდან ფეკალური მასა გადმოდის, სადარბაზოში რომ შევიდეთ, ნავი გვჭირდება...

კორპუსებთან მისასვლელ გზებს ჩვენს უბანში მხოლოდ იქ აკეთებენ, სადაც ქარელის გამგეობის თანამშრომლები ცხოვრობენ. უკვე ასჯერ ვიყავით გამგეობაში, განცხადებები შევიტანეთ, მაგრამ აქამდე არავინ მოსულა.

თუ ეს პრობლემები არ მოგვარდა, უახლოეს პერიოდში გადავკეტავთ რკინიგზას და თვალებს დავთხრი გამგებელს...

ჩვენს ქუჩაზე, სადაც 100-ზე მეტი ოჯახი ცხოვრობს, არ არსებობს არანაირი სკვერი, ბავშვებს სკოლაში წასვლა ამორტიზებული გზის მეშვეობით უწევთ. იმის გამო, რომ ჩვენი ქუჩა ქარელიდან მოშორებით მდებარეობს, ბავშვები სკოლაში წასასვლელად მოკლე გზას იყენებენ, სადაც მდინარეზე ხიდის საშუალებით უწევთ გადასვლა. რამდენიმე თვის წინ, იმის გამო, რომ ხიდს მოაჯირი არა აქვს, წყალში მცირეწლოვანი ბავშვი ჩავარდა და დაიხრჩო... მოგვაქციონ ყურადღება“.

მძაფრი პროტესტის შემდეგ ამ უბნის მცხოვრებთა პრობლემებს ადგილობრივი ხელისუფლებაც გამოეხმაურა, თუმცა, ჯერ კონკრეტულს ვერაფერს ამბობს: ქარელის მუნიციპალიტეტის გამგეობის ინფრასტრუქტურის სამსახურის უფროსი ზურაბ ლეკიშვილი აცხადებს, რომ მუსხელიშვილის ქუჩაზე არსებული პრობლემები ეტაპობრივად მოგვარდება.

გიორგი ახალკაცი, "ნიუპოსტი", ქარელი.