სვეტიცხოვლობის ზეიმთან დაკავშირებით მცხეთაში, სვეტიცხოვლის საკათედრო ტაძარში ლოცვა დღეს 18.00 საათზე დაიწყება, ხოლო წირვა ხვალ, 14 ოქტომბერს, 10:00 საათზე. ამის შესახებ საქართველოს საპატრიარქოს განცხადებაშია ნათქვამი.

წირვა-ლოცვას სრულიად საქართველოს კათოლიკოს-პატრიარქი, უწმიდესი და უნეტარესი ილია II წმიდა სინოდის წევრებთან და სამღვდელოებასთან ერთად აღავლენს.

მცხეთის მიმართულებით, ავტობუსები საპატრიარქოს მიმდებარე ტერიტორიიდან მრევლისთვის ხვალ  დილის 08:00 საათზე გავა.

საპატრიარქოს ინფორმაციით, ლოცვაზეც და წირვაზეც სვეტიცხოვლის საკათედრო ტაძარში დაბრძანებული იქნება წმიდა მეფე დავით აღმაშენებლის მიერ მოძიებული მსოფლიო დიდთა წმინდანთა წმიდა ნაწილები და ხალხს ამ სიწმინდეებთან მიახლების საშუალება ექნება.