ხობის რაიონში ჩატარებული სპეცოპერაციის დროს დაჭრილი პოლიციელების სიცოცხლეს საფრთხე არ ემუქრება.

საავადმყოფოში მოთავსებული სამართალდამცველები მსუბუქად არიან დაჭრილები და ამჟამად თავს კარგად გრძნობენ.

"ოპერაციის მსვლელობისას ორი ავტომატითა და ხელყუმბარებით შეიარაღებულმა ოკუჯავამ წინააღმდეგობა გაუწია პოლიციის თანამშრომლებს. ორმხრივი სროლისას თეიმურაზ ოკუჯავას ლიკვიდაცია მოხდა. 

სროლის შედეგად დაიღუპა სამეგრელო-ზემო სვანეთის სპეცდანიშნულების რაზმის თანამშრომელი დავით დემურია, ასევე დაჭრილია პოლიციის ოთხი თანამშომელი. მათ სხეულის სხვადასხვა ადგილებში ხელყუმბარის ნამსხვრევები მოხვდათ.

თეიმურაზ ოკუჯავა 2013 წლის 3 აგვისტოდან ყაჩაღობის ბრალდებით იძებნებოდა. ის თანამზრახველებთან ერთად 1-ელ ოქტომბერს ხობის რაიონის სოფელ თორსაში საკუთარი ნათესავების - ქარჩავების ოჯახს თავს დაესხა. ყაჩაღური თავდასხმის შედეგად ოჯახის უფროსი დაიღუპა. 

დანაშაულებრივი ჯგუფის ერთი წევრი სამართალდამცველებმა რამდენიმე დღის წინ დააკავეს, ხოლო მეორე ამჟამად აფხაზეთის ტერიტორიაზე იმყოფება", - ნათქვამია შსს-ს მიერ გუშინ გავრცელებულ გავრცელებულ ინფორმაციაში.

შეგახსენებთ, რომ პირი, რომელმაც პოლიციელი მოკლა, 2005 წელს ყაჩაღობისთვის იყო დაკავებული და 9 წლით თავისუფლების აღკვეთა ჰქონდა მისჯილი. 

ის ციხიდან ამნისტიის შედეგად, 2013 წლის აპრილში გამოვიდა და ორი ყაჩაღობაში მონაწილეობდა, მათგან ერთში - უკვე ძებნილის სტატუსით. ბოლო ყაჩაღობა აწ უკვე ლიკვიდირებული პირის მონაწილეობით, ხობის რაიონის სოფელ თორსაში მსხვერპლით დასრულდა.