მოძრაობა ,,დაბრუნების“ თავმჯდომარე მალხაზ პატარაია ,,ფეისბუქის“ გვერდზე ლევან ყიფიანს პასუხობს:

,,ბატონო ლევან,

 თავის მართლებას არ ვაპირებ, მით უფრო თქვენს წინაშე. არავის სატელიტი არასოდეს არ ვყოფილვართ და არც ვიქნებით. ეს ძალიან კარგად იციან იმათ, ვინც გვიცნობს. მტერმაც და მოყვარემაც. ვფიქრობ რომ თქვენი ტირადა მხოლოდ თქვენი გაუთვითცნობიერებლობით და ბოლო 25 წლის საზოგადოებრივი ცხოვრებისადმი ინტერესის დეფიციტით არ აიხსნება. ეს სამთავრობო ფორმულაა ცენტრის ინიციატორი პოლიტიკური და საზოგადოებრივი ორგანიზაციების წინააღმდეგ, მათი კომპრომეტაციისათვის. მინდა გითხრათ, რომ მთელი თქვენი კომპანია სხვა არაფერია, თუ არა ახალი ,,შულავერის მთავრობა“, კრემლის სატელიტი, რომლის დანიშნულება და მისია ძალაუფლების სანაცვლოდ სამშობლოს დაჩოქება, ღირსების აყრა და დამპყრობლის საჯიჯგნად მიგდებაა. ეს კონფერენციაზეც აღვნიშნე. გირჩევთ, კარგად დაუფიქრდეთ რას ამბობთ, რას აკეთებთ და სად მიგიჩენთ ადგილს ისტორია. ჩემი აზრით, სერგო ორჯონიკიძის და ფილიპე მახარაძის გვერდით. მე გაგაფრთხილეთ!“, - წერს მალხაზ პატარაია.

შეგახსენებთ, რომ საქართველოს სპორტისა და ახალგაზრდობის მინისიტრმა, ლევან ყიფიანმა არასაპარლამენტო ოპოზიციას უპასუხა და მათ ,,ნაციონალური მოძრაობის“ სატელიტები უწოდა. არასაპარლამენტო ოპოზიციამ სოჭის ოლიმპიადასთან დაკავშირებული განცხადებების გამო რეინტეგრაციის მინისტრის პაატა ზაქარეიშვილის და სპორტისა და ახალგაზრობის მინისტრის ლევან ყიფიანის გადადგომა მოითხოვა.