დღეს, წმინდა სინოდის სხდომის დასრულების შემდეგ, იღუმენმა სვიმეონ თაკაშვილმა ჟურნალისტებთან საუბრისას განაცხადა, რომ ექვს ახალ ეპარქიას შორის, რომელიც წმინდა სინოდის დღევანდელი გადაწყვეტილებით შეიქმნება, ერთ-ერთი სურამის და ხაშურის ეპარქია იქნება.

მისივე განმარტებით, სურამის და ხაშურის ეპარქია რუის-ურბნისის ეპარქიას გამოეყო.

"წმინდა სინოდის გადაწყვეტილებით, რუის-ურბნისის ეპარქიას სურამისა და ხაშურის ეპარქია გამოეყო. მისი უწმინდესობის ლოცვა-კურთხევით და სინოდის რჩეულთა განჩინებით, ეს მძიმე და ამასთან ერთად ტკბილი ტვირთი მე დამეკისრა ღვთის სადიდებლად და ქვეყნის გასაერთიანებლად. თითოეული თქვენგანის კეთილდღეობაზე ლოცვით, მე შევეცდები, ღირსეულად ვატარო ეს ტვირთი და გავამართლო მისი უწმინდესობის იმედი და სინოდის რჩეულთა ნდობა", - განაცხადა სვიმეონ თაკაშვილმა.