"დღეს, სხვადასხვა მედიასაშუალებების მიერ გავრცელდა ინფორმაცია, სადაც პარლამენტარი ეკა ბესელია არასრულწლოვანი პატიმრის, გოგა ძველაიას გარდაცვალების ფაქტზე პასუხისმგებლობას საქმის განმხილველ მოსამართლესაც აკისრებს. რატომ გაუშვეს 16 წლის ახლაგაზრდა ციხეში, როდესაც მას შეფარდებული ჰქონდა გირაო? - სვამს კითხვას პოლიტიკოსი ქალბატონი ისე, რომ საქმის რეალური არსი, სავარაუდოდ, არ იცის, ან იცის, მაგრამ რატომღაც მაინც არაზუსტ ინფორმაციას ავრცელებს. არ გვინდა ვივარაუდოთ, რომ მიზანი ამ შემთხვევაში სასამართლო ხელისუფლების დისკრედიტაციის მცდელობაა.

2013 წლის 5 ოქტომბერს სენაკის რაიონულ სასამართლოს შუამდგომლობით მომართა სენაკის რაიონული პროკურატურის პროკურორმა და ბრალდებულების, გოგა ძველაიას და გიორგი ნაჭყებიას მიმართ აღკვეთის ღონისძიების სახით დაპატიმრების გამოყენება მოითხოვა. გოგა ძველაიას და გიორგი ნაჭყებიას ბრალი დაედო 2013 წლის 3 ოქტომბერს მომხდარი ქურდობის ფაქტზე, სასამართლო პროცესზე პროკურორმა გიორგი ნაჭყებიას მიმართ შეცვალა მოთხოვნა და მოითხოვა 5000 ლარის ოდენობით გირაოს გამოყენება პატიმრობის უზრუნველყოფით, რადგან მისი განმარტებით, ბრალდებული მომავალში აპირებდა გამოძიებასთან თანამშრომლობას.

პროკურორმა გოგა ძველაიას მიმართ კატეგორიულად მოითხოვა დაპატიმრების გამოყენება იმ მოტივით, რომ ბრალდებული ორჯერ იყო ნასამართლები განზრახ მძიმე დანაშაულისათვის და არსებობდა ბრალდებულის მიერ დანაშაულის კვლავ ჩადენის საფრთხე. სასამართლო სხდომაზე მოსამართლემ პროკურორს განუმარტა, რომ საქართველოს პრეზიდენტის 2013 წლის 2 ოქტომბრის განკარგულების საფუძველზე გოგა ძველაიას მოეხსნა ნასამართლობა. შესაბამისად, დანაშაულებრივი ფაქტის მოხდენისა და შუამდგომლობის განხილვის ეტაპისათვის გოგა ძველაია არ ითვლებოდა ნასამართლევად.

მიუხედავად ამისა, პროკურორმა კვლავ კატეგორიულად მოითხოვა ბრალდებულის მიმართ აღკვეთის ღონისძიების სახედ დაპატიმრების გამოყენება. სასამართლომ პროკურორის მოთხოვნა ჩათვალა ზედმეტად მკაცრად და იმის გათვალისწინებით, რომ ბრალდებული გოგა ძველაია იყო არასრულწლოვანი და ნასამართლობის არმქონე პირი, მას შეუაფრდა გირაო 5000 ლარის ოდენობით.

ვინაიდან ბრალდებული სასამართლოში წარმოდგენისას იყო დაკავებული, საქართველოს სსსკ-ის მე-200 მუხლის მე-6 ნაწილის შესაბამისად, სასამართლომ ბრალდებულის მიმართ, გირაოს უზრულველყოფის მიზნით, გირაოს თანხის გადახდამდე გამოიყენა დაპატიმრება, ვინაიდან ასეთ შემთხვევაში ბრალდებულის დაკავებიდან განთავისუფლებას საპროცესო კანონმდებლობა არ ითვალისწინებს", - ნათქვამია სენაკის სასამართლოს განცხადებაში.