როგორც პატიმრის მეუღლე აცხადებს, მას შემდეგ, რაც 13 სექტემბერს მან არსებულ პრობლემებზე მედიის საშუალებით ისაუბრა, მისი მეუღლის მიმართ ეგრეთ წოდებული მაყურებლებისა და რუსთავის მე-6 დაწესებულების ადმინისტრაციის მხრიდან ზეწოლა ხორციელდება.

რიმა ბურჯანაძე საკუთარ ადვოკატზე დაყრდნობით აცხადებს, რომ პატიმარმა სხვა დაწესებულებაში გადაყვანის მოთხოვნით პირი ამოიკერა და შიმშილობა გამოაცხადა. "ჩემს მეუღლეს აშანტაჟებენ და ეუბნებიან, რომ თუ მედიასთან საუბარს არ შევწყვეტ, იგი ციხიდან ცოცხალი ვერ გამოვა და მეც საფრთხე მემუქრება. ციხის თანამშრომელმა უთხრა ჩემს მეუღლეს, რომ არჩევნების დასრულებისთანავე მათ იციან მას როგორ "მიხედონ", - აცხადებს პატიმრის მეუღლე.