შს მინისტრმა ირაკლი ღარიბაშვილმა მონაწილეობა მიიღო 2013 წლის 7-8 ოქტომბერს ლუქსემბურგში გამართულ ევროკავშირისა და აღმოსავლეთ პარტნიორობის ქვეყნების იუსტიციისა და შინაგან საქმეთა მინისტრების შეხვედრაში. აღნიშნული მინისტერიალი მიზნად ისახავდა თანამშრომლობის სამომავლო გეგმებისა და პრიორიტეტული სფეროების იდენტიფიცირებას და ევროპული ინტეგრაციის პროცესის გაღრმავებას, განსაკუთრებით, ვილნიუსის მომავალი სამიტის გათვალისწინებით. 

მინისტერიალზე სხვა საკითხებთან ერთად განიხილეს ორგანიზებული დანაშაულის წინააღმდეგ ბრძოლის ფარგლებში სამინისტროს მიერ გატარებული საკანონმდებლო და ინსტიტუციური ღონისძიებები, მათ შორის, ე.წ. კანონიერი ქურდების ფენომენის წინააღმდეგ ბრძოლაში მიღწეული წარმატება და შესაბამისი გამოცდილების გაზიარება სხვა ქვეყნებისთვის. მინისტრმა მხარეებს ორმხრივი ხელშეკრულებების დადებისა და პოლიციის ატაშეების დანიშვნის გზით საერთაშორისო თანამშრომლობის გაღრმავებისკენ მოუწოდა, ასევე, გამოთქვა ევროპოლთან თანამშრომლობის დამყარების სურვილი. 

კორუფციის წინააღმდეგ ბრძოლის სფეროში აღინიშნა პოლიციის სექტორში გატარებული რეფორმა და სხვა ქვეყნებისთვის შესაბამისი გამოცდილების გაზიარებისთვის მზაობა. კიბერდანაშაულის წინააღმდეგ ბრძოლის ფარგლებში ხაზი გაესვა თანამედროვე გამოწვევებს და ამ კუთხით, საერთაშორისო თანამშრომლობის მნიშვნელობას, მათ შორის, ოპერატიული ინფორმაციის დროული გაცვლის მიზნით. მინისტერიალის ფარგლებში ასევე განიხილეს მიგრაციისა და მობილურობის სფეროში არსებული სიტუაცია და სამომავლო თანამშრომლობის პერსპექტივები. ქართულმა მხარემ ყურადღება გაამახვილა არალეგალურ მიგრაციასთან ბრძოლის სფეროში გამოცდილებისა და საუკეთესო პრაქტიკის გაზიარების მნიშვნელობაზე. 

დასასრულს, მინისტერიალზე მიიღეს ერთობლივი დეკლარაცია სამომავლო თანამშრომლობის გაღრმავების მიზნით.