შსს-ს პრესსამსახური არ ადასტურებს „ზონანიუსის“ მიერ გავრცელებულ ინფორმაციას, რომლის თანახმადაც, პოლიციელი მასწავლებელს ფიზიკურად გაუსწორდა, შემდეგ კი სხვა პოლიციელებთან ერთად მასზე ფსიქოლოგიურ ზეწოლას ახდენდა.

როგორც შსს-ს საზოგადოებასთან ურთიერთობის დეპარტამენტის ხელმძღვანელმა ნინო გიორგობიამა „ნიუპოსტთან“ საუბარში განაცხადა, დავით კაპანაძეზე პოლიციელების მხრიდან ზეწოლა არ მომხდარა და ის 30 სექტემბერს ნარკოლოგიურ შემოწმებაზე გადაიყვანეს, რა დროსაც მან სამართალდამცველებს წინააღმდეგობა გაუწია:

„ეს პიროვნება 30 სექტემბერს გადაიყვანეს ნარკოლოგიურ შემოწმებაზე. როდესაც პოლიციელები ცდილობდნენ მის გადაყვანას შემოწმებაზე, მან გაუწია სამართალდამცველებს წინააღმდეგობა. აღძრულია საქმე ორი მუხლით, ადმინისტრაციულ სამართალდარღვევათა  კოდექსის 45-ე და 173-ე მუხლებით. ნარკოლოგიური შემოწმების შედეგად დავით კაპანაძეს  დაუდგინდა ბუპერნორფინისა (ამ ნივთიერებას „სუბოტექსი“ შეიცავს, - რედ.) და მარიხუანას მოხმარების ფაქტი, რის შემდეგაც ის ხელწერილის საფუძველზე გამოუშვეს იმავე დღეს.

ამის შემდეგ ამ პიროვნებამ დარეკა პოლიციის დიდუბე-ჩუღურეთის სამმართველოში და განაცხადა, რომ მას უცნობმა მამაკაცებმა მიაყენეს ფიზიკური  შეუაცხყოფა. ამ საქმეზე გამოძიებამ დაიბარა აღნიშნული პირი და მან ჩვენებაში თქვა, რომ იცრუა და მასზე არავის არ განუხორციელებია ფიზიკური ზეწოლა. მისი თქმით, იყო ნასვამ მდგომარეობაში და არავისთან პრეტენზია არა აქვს.

ეს არის ის, რაც ამ პირმა ჩვენებაში განაცხადა. ჩვენ არ ვადასტურებთ პოლიციის მხრიდან მასზე ძალადობის ფაქტს - ამ ადამიანზე არსებობდა ინფორმაცია, რომ მოიხმარდა ნარკოტიკულ ნივთიერებებს და დაუდგინდა კიდევაც ეს ფაქტი“, - აღნიშნა ნინო გიორგობიანმა „ნიუპოსტთან“ საუბრისას.