კორუფცია, ნეპოტიზმი და რუსული ინტერესი საქართველოს რკინიგზაში - ვინ ლობირებს კოკა გუნცაძეს და რა ფაქტებზე საუბრობენ რკინიგზელები

პოლიტიკა - 01:06, 05 Jul, 2019

3232

კორუფცია, ნეპოტიზმი, თანხების არამიზნობრივი ხარჯვა, პირადი ინტერესებით ნაკარნახევი საკადრო პოლიტიკა და რაც მთავარია, საქართველოს სახელმწიფოსთვის მნიშვნელოვანი სტრატეგიული ობიექტის ოკუპანტი ქვეყნისთვის შესაძლო გადაცემა - ეს იმ ბრალდებების მცირე ჩამონათვალია, რომელიც საქართველოს რკინიგზის ადმინისტრაციის მისამართით არსებობს.

თუმცა არაერთი ღია ბრალდების მიუხედავად, პროკურატურა საკითხით ამ დრომდე არ დაინტერესებულა. არსებობს ეჭვი, რომ რკინიგზის სამეთვალყურეო საბჭოს თავმჯდომარე, კოკა გუნცაძე იმუნიტეტსა და თანამდებობას ბიძინა ივანიშვილის დეიდაშვილის, უჩა მამაცაშვილისა და მამუკა ბახტაძის ლობირების ხარჯზე ინარჩუნებს.

საქართველოს რკინიგზაში დასაქმებულთა შორის უთანასწორო სახელფასო პოლიტიკაზე და გაზრდილ შტატებზე საუბრობენ რკინიგზელთა პროფკავშირშიც.

ორგანიზაციამ გუშინ მონაცემები გამოაქვეყნა, საიდანაც ირკვევა, რომ რკინიგზაში სხვადასხვა პოზიციაზე დასაქმებულთა ანაზღაურების უთანასწორობის მაჩვენებელი, კატასტროფულად მძიმეა. მაგალითად, საქართველოს რკინიგზის დირექტორს რიგით რკინიგზელზე 40-ჯერ მეტი ხელფასი აქვს.

„ნიუპოსტი“ რკინიგზელთა ახალი პროფკავშირის თავმჯდომარის მოადგილეს ილია ლეჟავას ესაუბრა.

"საქართველოს რკინიგზაში სახელფასო გადანაწილებასთან ერთად, ჩვენ პრობლემას ვხედავთ საკადრო პოლიტიკაში, რომელიც ძალიან არასწორია. ვხედავთ, გენერალური დირექტორის 5 თანაშემწეს, 6 მოადგილეს, მრჩევლებს და ასე შემდეგ. ვფიქრობ, რიგი თანამდებობები საერთოდ არ არის საჭირო. ფაქტია, რომ თანამშრომლებს, რომლებზეც რეალურად დგას საქართველოს რკინიგზა, ყოველდღიურად უწევთ მუშაობა, 2013 წლიდან ხელფასები არ მომატებიათ.

ელმავლის მემანქანეები, ლიანდაგის მონტიორები, ელექტრომომარაგების თანამშრომლები ძალიან მძიმე სოციალურ მდგომარეობაში არიან და ამ ფონზე რომ ვიღაცა 6 მოადგილეს ინიშნავს და 7 თანაშემწე ჰყავს, ეს რა თქმა უნდა უსამართლობაა. ჩვენ კოლექტიურ შრომის დავას ვამზადებთ და დავაყენებთ მოთხოვნას რომ რიგით თანამშრომლებს ხელფასები გაეზარდოთ. სწორედ ამ დავის მზადების დროს გამოვლინდა ეს ფაქტი, რაზეც გუშინ ინფორმაცია გავავრცელეთ - საკადრო პოლიტიკა იმდენად არასწორი აქვს რკინიგზას, რომ ის თანხები, რაც იხარჯება არამიზნობრივად, კარგი იქნებოდა დაიხარჯოს რკინიგზაში დასაქმებულ ადამიანებზე, რომ მათი სოციალური მდგომარეობა გაუმჯობესდეს"- განაცხადა "ნიუპოსტთან" ილია ლეჟავამ.

რკინიგზელთა ახალი პროფკავშირი ასევე სწავლობს საქართველოს რკინიგზის მიერ 64 მილიონის ღირებულების 800-მდე სარკინიგზო ვაგონის რუსულ კომპანიებისთვის შესაძლო გადაცემის საკითხს.

"აღნიშნული ინფორმაცია მასმედიით გავრცელდა. ჩვენი ეკონომისტები და ფინანსისტები სწავლობენ რკინიგზის კონტრაქტებსა და ხელშეკრულებებს, საკადრო პოლიტიკას და ასე შემდეგ. სწავლობენ გადაზიდვების მაჩვენებელს და სწორედ ამ ინფორმაციის ანალიზის საფუძველზე უნდა დავადგინოთ რა მდგომარეობაა ამ მიმართულებით.

თუ აღმოჩნდება, რომ საქართველოს რკინიგზა არამიზნობრივად ხარჯავს თანხებს და რუსულ კომპანიებს გადასცემს იჯარით ვაგონებს, ამასაც დავადგენთ და რა თქმა უნდა გავასაჯაროებთ. ამ ეტაპზე ვამუშავებთ საშტატო განრიგს, სადაც აშკარად ჩანს, რომ გაბერილი შტატებია, კომპანიაში დასაქმებულები არიან ისეთი ადამიანები, რომლებსაც საერთოდ არანაირი შეხება არ აქვთ რკინიგზასთან. ხელფასს იღებენ ისეთი ადამიანები, რომლებიც საერთოდ არ დადიან სამსახურში"- განაცხადა ლეჟავა.