"წამლის ერთი ტაბლეტი რომ ლარით მეტი ეღირება, რაზეა საუბარი. მთელი კოლოფი კიარა, 1 ცალი"!

მედიკამენტი თითოეული ადამიანის ცხოვრებაში აუცილებელი და გარდაუვალი საშუალებაა. თუმცა ის, თუ რამდენად ხარისხიანია და რამდენად კარგად მოდის ჩვენამდე, დიდ კითხვის ნიშანს ტოვებს.

ქართულ ფარმაცევტულ ბიზნესში ერთ-ერთი მოწინავეა კომპანია „ავერსი“. ის მოიცავს როგორც სააფთიაქო ქსელს, ასევე რამდენიმე კლინიკას და სადაზღვევო კომპანიასაც კი. „ავერსის“ კუთვნილებაშია მედიკამენტების საწარმოც, სადაც დამზადებული წამლები აფთიაქების დახლებზე ხვდება.

პენსიონერები და მედიკამენტებზე მუდმივად დამოკიდებული ადამიანები აღნიშნულ ქსელში წამლების სიძვირეს უჩივიან. იმასაც ამბობენ, რომ მათი შემოსავალი მთლიანად აფთიაქებში რჩება. „ავერსი“ ბაზარზე მაღალი ფასებით გამოირჩევა. მას სხვა აფთიაქებთან შედარებით საკმაოდ მომატებული საფასური აქვთ დაწესებული. ამის გამო უკმაყოფილებას უამრავი მომხმარებელი გამოთქვამს.

„მე პრობლემა, ძირითადად, ფასებზე მაქვს. 1 ტაბლეტი წამალი რომ ლარით მეტი ეღირება, რაზეა საუბარი?! მთელი კოლოფი კიარა – 1 ცალი. ყველაზე ცუდად ავერსშია ამ მხრივ საქმე, რომ ვუყურებ“, - ამბობს მომხმარებელი ქეთევან ჯომიდავა.

საკმაოდ ხშირია შემთხვევები, როდესაც „ავერსის“ კლინიკაში მისულ პაციენტს ექიმი მხოლოდ „ავერსის“ ფარმაცევტული საწარმოს წამლებს უნიშნავს და მიუთითებს, რომ მედიკამენტი აუცილებლად ავერსის აფთიაქში შეიძინოს. ასეთ დროს მომხმარებელს არჩევანი არ აქვს და იძულებულია ექიმის დანიშნულება შეასრულოს. იქმნება შთაბეჭდილება, რომ „ავერსის“ კომპანიები ერთმანეთს „ამუშავებენ“ და სარგებლობენ პაციენტთა მდგომარეობით.

საქართველოს კანონმდებლობით, სახელმწიფო არ ერევა ფარმაციულ ბაზარზე სამკურნალო საშუალებების ფასწარმოქმნისა და რეგულირების პოლიტიკაში. დღემდე დაუდგენელია იმპორტის შემდეგ ან წარმოების შემდეგ რამდენი პროცენტის მომატების უფლება აქვს ფარმაცევტულ კომპანიას. დარგთან დაახლოებული სპეციალისტები ამბობენ, რომ სწორედ ეს არის მედიკამენტებზე არსებული კატასტროფული ფასის მიზეზი.