საქართველოს პრეზიდენტი მიხეილ სააკაშვილი სოჭის ოლიმპიადის მთავარ მეჩირაღდნედ 2008 წლის რუსეთ-საქართველოს ომის „გმირის“ არჩევას ეხმაურება და აღნიშნავს, რომ არ ახდენს ზეწოლას ოლიმპიურ კომიტეტზე, თუმცა, ყველას სწორი გადაწყვეყილების მიღებისკენ მოუწოდებს.

მიხეილ სააკაშვილის განცხადებით, ვლადიმირ პუტინი სოჭის ოლიმპიადას აფხაზეთისა და ცხინვალის იდეის პოპულარიზაციისთვის გამოიყენებს:

"დარწმუნებული ვარ ეს ყველაფერი გამიზნულად არის გაკეთებული. ისევე როგორც, გამიზნულად ჩამოიყვანენ იქ აფხაზეთის და ე.წ. სამხრეთ ოსეთის ე.წ. დელეგაციებს. წაიყვანენ ოლიმპიადის სტუმრებს ექსკურსიაზე აფხაზეთში, გამოიყენებენ აფხაზეთის ინფრასტრუქტურას ჩვენი ნებართვის გარეშე... 

პუტინი გამოიყენებს ამ ოლიმპიადას აფხაზეთის და ცხინვალის იდეის პოპულარიზაციისთვის. მოვუწოდებ ყველას, მიიღოს თავისი გადაწყვეტილება. მე არ ვახორციელებ ზეწოლას ოლიმპიურ კომიტეტზე, ეს მათი გადასაწყვეტი უნდა იყოს. მაგრამ ისინი, გარდა იმისა, რომ ოლიმპიური კომიტეტი არიან, არიან ქართველები და ქართველს უნდა ჰქონდეს სწორი რეაქცია",- აღნიშნა მიხეილ სააკაშვილმა.