სოციალურ ქსელში ფოტოგრაფი ზურაბ ცერცვაძე "გავრილოვის ღამეს" იხსენებს.

"ამ კადრის ისტორია:

იმ ღამით, სპეცრაზმის უკან შევედი (შესვლის ამბავი ცალკე ისტორიაა). რკინის ჭიშკრამდე შევძელი მისვლა. დავდექი და მაქსიმალურად შეუმჩნევლად ვიღებდი სპეცრაზმის ზურგში მომხდარ ამბებს. წინასწარ შევიტყვე სროლის ბრძანების შესახებ. შეძლებისამებრ ვაფრთხილებდი გარეთ მდგომ მეგობრებს. ვხედავდი, როგორ გამეტებით ურტყავდნენ დაკავებულებს და გინებით გაყავდათ პარლამენტის ჭიშკრის უკან. ჩემი ნერვების ნამდვილი გამოცდა იყო. ვხედავდი, როგორ ამცირებდნენ რუსული ოკუპაციის გასაპროტესტებლად გამოსულ ახალგაზრდებს. ნერვებს ვერ ვიოკებდი. ჩემი კამერა არ მაძლევდა საშუალებას რამე მეთქვა ან გამეკეთებინა. სამწუხაროდ, ბევრი კადრის გადაღება ამიკრძალეს. რადგან მათიანი ვეგონე ჩემთან ღიად საუბრობდნენ. ბევრი მათგანი შეძრწუნებული იყო გავრილოვის ამბით, მაგრამ ბრძანებას ასრულებდნენ. ბევრი კი, გინებით და დაკავებულების ცემით იყო გართული. სროლის დაწყებიდან ცოტა ხანში ვიღაცამ მიცნო. "ამას აქ რა უნდა, სასწრაფოდ გაათრიეთო". ხელის ჯიკაობით გამიშვეს კორდონის მხარეს. შემდეგ - ცრემლსადენი გაზის გამო დაცლილ მოედანზე მარტო მყოფს რამდენიმე ტყვია დამიზნებით მხვდება..." - წერს ზურა ცერცვაძე.