ქართველმა სტუდენტებმა დღეს დვანში მცოცავი ოკუპაცია გააპროტესტეს. ისინი ჯერ ადგილობრივ მოსახლეობას შეხვდნენ და ადგილზე გაეცნენ არსებულ ვითარებას.

მოგვიანებით სტუდენტებმა ცოცხალი ჯაჭვი შეკრეს იმ ადგილას, სადაც რუსმა ე.წ. მესაზღვრეებმა რკინის კონსტრუქციებითა და მავთულხლართებით გაავლეს, მათი მტკიცებით, სადემარკაციო ხაზთან.

საოკუპაციო ხაზს მიღმა დვანელების მიწის ნაკვეთები და 3 საცხოვრებელი სახლი მოჰყვა. ამ დროისთვის ოკუპანტებს ე.წ. სასაზღვრო ნაგებობების მშენებლობა შეჩერებული აქვთ.

ადგილობრივები აცხადებენ, რომ ოკუპანტებმა სამუშაოები დროებით შეაჩერეს და სავარაუდოდ, მალე ისევ გამოჩნდებიან. დვანელები იმასაც გვიყვებიან, რომ სოფელს საველე სათვალთვალო მოწყობილობებით მუდმივად აკონტროლებენ რუსი ოკუპანტები.  დღეს დვანში ჩასული სტუდენტები აცხადებდენ, რომ მცოცავი ოკუპაციის წინააღმდეგ  მათი აქციები პერმამენტულ სახეს მიიღებს და ყოველდღიურად გაგრძელდება.

რაც შეეხება პროფკავშირების ახალგაზრდობის აქციას, მათ საოკუპაციო ზოლთან თეატრალიზებული წარმოდგენა მოაწყვეს და აქციაზე მსოფლიოს პოლიტიკური ლიდერების ნიღბებით მივიდნენ.

პროფკავშირის ახალგაზრდები აცხადებენ, რომ მსოფლიოს ლიდერებმაც ხმა უნდა ამოიღონ ოკუპაციის გამო, წინააღმდეგ შემთხვევაში მხოლოდ თავისი ძალებით ქართული საზოგადოება ვერაფერს გახდება.

გიორგი ახალკაცი, "ნიუპოსტისთვის", დვანი.