იუიჩი იში იაპონელი ბიზნესმენი და მსახიობია. იგი 38 წლისაა, მაგრამ მან უკვე მოასწრო გამხდარიყო მამა, სასიძო, ექს-საყვარელი, ბოიფრენდი, მეგობარი და აშ. თან რამდენიმეჯერ. თუმცა ყოველ ჯერზე - არასერიოზულად.

იშიმ დააფუძნა კომპანია, Family Romance (საოჯახო რომანი), რომელიც ნათესავების, მეგობრებისა და პარტნიორების გაქირავებითაა დაკავებული. მას ეს იდეა 14 წლის წინ დაებადა, მაშინ როდესაც მის მეგობარ ქალბატონს "ქმრობა" გაუწია, რადგან კერძო საბავშვო ბაღი, სადაც ქალს ბავშვი უნდა მიეყვანა, ორივე მშობელთან გასაუბრებას ითხოვდა. იშიმ მისი "მეუღლის" როლი არცთუ ისე წარმატებით შეასრულა - "შვილი" და "მამა" როლში კარგად ვერ შევიდნენ, თუმცა, კომპანიის იდეა სწორედ მაშინ დაიბადა.

იუიჩის კომპანიის წარმატება იმ ფაქტმა განაპირობა, რომ იაპონიაში არ უყვართ საკუთარ გრძნობებზე, ემოციასა და ურთიერთობებზე ღიად საუბარი და რეალობაზე მაღლა მოჩვენებითობას აყენებენ.

კომპანიაში ამჟამად 2200 უშტატო თანამშრომელია, რომლებიც წარმატებით თამაშობენ დედებისა თუ მამების, დეიდებისა და ბიძების, ქმრის ან ცოლის, შეყვარებულისა თუ საყვარლის, თქვენ წარმოიდგინეთ ბებია-ბაბუების როლსაც.

ბიზნესმენი აცხადებს, რომ მისი კლიენტების მოტივაცია სრულიად გასაგებია. მაგალითად, ქალები ქირაობენ ქმრებს ან საყვარლებს, რათა აბეზარი თაყვანისმცემლები მოიშორონ თავიდან. თამაშდება "ქორწილის" სცენა, რომლითაც ქალი ან ვაჟი მშობლების მიერ ძალდატანებულ, მათთვის არასასურველ ადამიანზე ქორწინებას არიდებენ თავს. ხშირად ვაჟი ან ქალი თავის პარტნიორს ყალბ დედ-მამას ან ბებია-ბაბუას "აცნობს" და აშ. არის შემთხვევები, როდესაც იშის არატრადიციული სექსუალური ორიენტაციის ადამიანი მიმართავს თხოვნით, რათა საპირისპირო სქესის ადამიანთან ყალბი ქორწინებით, თავისი ნამდვილი ურთიერთობები დამალოს.

თავიდან იშიც აქტიურად იყო ჩართული ამ საქმეში და არც ახლა თაკილობს მოჩვენებითი ნათესავის როლის თამაშს. მას 35 "შვილი" ჰყავს, 5-ჯერ იყო "დაქორწინებული", ასამდე ქალის თხოვნით შეასრულა საყვარლის შეყვარებულისა თუ მეგობრის როლი. ამ დროს რეალურად მას არც ოჯახი და არც შვილები არ ჰყავს.

ურთიერთობები მოჩვენებითობის ფარგლებს არასდროს სცილდება. იშის განცხადებით, ყველაზე რთული მცირეწლოვან "შვილებთან" განშორებაა, როდესაც ბავშბი და დაქირავებული მამა ერთმანეთს შეეჩვევიან.

"იაპონიაში არ უყვართ საკუთარ გრძნობებზე, ემოციასა და ურთიერთობებზე ღიად საუბარი და რეალობაზე მაღლა მოჩვენებითობას აყენებენ. ჩვენ კლიენტებს სწორედ ამაშ ვეხმარებით," - ამბობს იში, რომელიც ამასთანავე აცხადებს, რომ მას გარკვეული კონტაქტები აქვს "შვილებთან" და სხვა 50-მდე "ნათესავ-მეგობართან".

განსაკუთრებით მრცხვენია, როდესაც პატარებს ვატყუებ" - აცხადებს იგი.