აქცია "ფეისბუქზე" დაანონსდა, მას ორგანიზებას სტუდენტები უწევენ და აქციას უკვე ბევრი ინტერნეტ მომხმარებელი შეუერთდა.

"როგორც იცით, რუსეთის საოკუპაციო ჯარი აგრძელებს ე.წ. სასაზღვრო ზოლის გადმოწევას და ქართული სოფლების ანექსირებას. ოკუპანტებმა სოფელ დვანის მოსახლეობა აიძულეს, რომ ოკუპირებულ ზოლში დარჩენილი სახლები დაეცალათ და მოეხდინათ მათი დემონტაჟი.

ჩვენ, სტუდენტების ნაწილი ვფიქრობთ, რომ აუცილებელია მომხდარი ფაქტის გაპროტესტება. გთავაზობთ, რომ საქართველოს ყველა დიდ ქალაქში გავმართოთ თვითორგანიზებული მანიფესტაცია.

13 ოქტომბერს, კვირას, 3 საათზე, თბილისის, რუსთავის, თელავის, გორის, ბათუმის, ქუთაისის, ზუგდიდის ცენტრალურ ქუჩებზე 15 წუთის განმავლობაში ჩავდგეთ ცოცხალ ჯაჭვში, რათა გავაპროტესტოთ ჩვენი ტერიტორიების მცოცავი ოკუპაცია და დავანახოთ საერთაშორისო საზოგადოებას, როგორც ჩვენს პოლიტიკურ მოკავშირეებს, ისე მოწინააღმდეგეებს, რომ პოლიტიკური და იდეოლოგიური განსხვავებების მიუხედავად, საქართველოს მოქალაქეების აბსოლიტური უმრავლესობა არ ეგუება და ერთიანი ძალებით იბრძვის მცოცავი ოკუპაციის წინააღმდეგ,“- ნათქვამია ანონსში.