შსს–ს მიერ ე.წ. ჯიჰადის ვიდეორგოლის გამოძიების შესახებ გახმიანებული დეტალების მიხედვით, ვიდეორგოლის დამზადებასა და ინტერნეტსივრცეში განთავსებისთვის ყირგიზეთის მოქალაქეს, ამჟამად სოხუმში მცხოვრებ სამარ ჩოკუტაევს სასამართლომ დაუსწრებლად შეუფარდა წინასწარი პატიმრობა.

მიმდინარეობს მისი ძებნა როგორც საქართველოს ტერიტორიაზე, ასევე მის ფარგლებს გარეთ. „ნიუპოსტი“ გთავაზობთ დამატებით ინფორმაციას და ბრალდებულის ფოტოებს, რომელიც „ფეისბუქზე“ მისი პროფილის მეშვეობით მოვიძიეთ. სამარ ჩოკუტაევის ბოლო აქტივობა „ფეისბუქზე“ 1 ოქტომბერს ფიქსირდება. ამ დღეს მან რამდენიმე ფოტო გაიზიარა და გამოაქვეყნა.

ჩოკუტაევს ფბ–ზე 54 მეგობარი ჰყავს, ე.წ. გარეყდის ფოტოდ აფხაზეთში გადაღებული პანორამული ფოტო აქვს ატვირთული, პროფილის ფოტოდ კი – საკუთარი.

აღსანიშნავია, რომ პანორამულ ფოტოზე ბიჭვინთის სამონასტრო კომპლექსია გამოსახული მაშინ, როცა ჩოკუტაევი, სავარაუდოდ, ქრისტიანული რელიგიის აღმსარებელი არ არის. 

პროფილში იძებნება აფხაზეთში და რუსეთში, კერძოდ, მოსკოვში გადაღებული ფოტოები. რამდენიმე ადგილას ჩოკუტაევი გოგონასთან ერთადაა გადაღებული.

პროფილის საინფორმაციო ბლოკის თანახმად, სამარ ჩოკუტაევი ყირგიზეთიდან, ქალაქ ბიშკეკიდანაა, საცხოვრებელ ადგილად კი სოხუმია მონიშნული. 2011 წელს დაამთავრა ყირგიზეთის სახელმწიფო ტექნიკური უნივერსიტეტი, მუშაობდა ნაციონალური ინფორმაციული ტექნოლოგიის ცენტრში კომპიუტერული ტექნოლოგიების სფეროში მრჩევლად 2010 წლის თებერვლიდან 2011 აგვისტომდე, 2011 წლის აგვისტოდან დეკემბრამდე კი „ტელეკომში“, ქსელის ადმინისტრატორად.

2011 წლის აპრილიდან ამავე წლის დეკემბრამდე ჩოკუტაევს სამუშაო ადგილად მითითებული აქვს სოხუმი, „აქვაფონი“, ქსელის ინჟინერის პოზიცია. საინფორმაციო ბლოკის მიხედვით, ჩოკუტაევი ამჟამად უმუშევარია. ჩოკუტაევის ინტერესის სფეროში მითითებულია „ქალი“.

ოჯახის შესახებ ინფორმაციაში მონიშნულია ბიძაშვილი ალენა ჩიკიშევა–კუდინოვა. პირად მონაცემებში გვხვდება რუსულ ენაზე დაწერილი სამარ ჩოკუტაევის საყვარელი სტროფი (საყვარელი ფრაზების ადგილას), რომელიც ვიქტორ ბერკოვსკის ეკუთვნის, თუმცა, არასწორი ციტირებაა:

„Каждый выбирает по себе.

Женщину, религию, дорогу.

Дьяволу служить или пророку –

Каждый выбирает по себе.“ – სინამდვილეში ბერკოვსკის ლექსის ეს სტროფი ასე უნდა იყოს მოყვანილი:

„Каждый выбирает для себя

Женщину, религию, дорогу.

Дьяволу служить или пророку,

Каждый выбирает для себя. „

სად იმყოფება ამჟამად სამარ ჩოკუტაევი და ცნობილია თუ არა მისთვის, რომ ჯერ კიდევ ერთი თვის წინ საქართველოში წინასწარი პატიმრობა დაუსწრებლად შეეფერდა, დაუდგენელია.

ლაშა ბერულავა, "ნიუპოსტი".