ზუგდიდის მუნიციპალიტეტის სოფლები ხურჩა და განმუხური, შესაძლოა, აფხაზეთის ოკუპირებულ ნაწილს მიუერთონ და რუსმა ოკუპანტებმა იქ მავთულხლართების გავლება დაიწყონ. 

ორივე სოფლის ადგილობრივი მოსახლეობა ამ საფრთხის შესახებ მას შემდეგ ალაპარაკდა, რაც ბოლო დღეებში განვითარებულმა მოვლენებმა დვანში დიდი გამოხმაურება ჰპოვა ოკუპირებულ აფხაზეთში განთავსებულ რუსულ სამხედრო კონტინგენტში.

„გადაადგილების დროს რუსები ხშირად გვეუბნებიან, დვანი მონაგონი იქნება, მალე საზღვარს აქაც გავავლებთ, ახლა თხრილების გასავლებად და ღობეების გასამაგრებლად მასალას ველოდებით რკინიგზით, ვაგონები უკვე წამოსულია რუსეთიდანო“, - აცხადებს გალის რაიონის სოფელ ნაბაკევში მცხოვრები ზაურ ტ.-ა. ნაბაკევი სოფელ ხურჩას ესაზღვრება. 

შეგახსენებთ, რომ სოფლები ხურჩა და განმუხური მდინარე ენგურს გაღმა მდებარე სოფლებია, რომლებიც ზუგდიდის რაიონში შედის. ენგურს გაღმა მდებარეობს ასევე სოფელ ორსანტიის ნაწილიც. აფხაზურ მხარეს ადრეც არაერთხელ გამოუთქვამს პრეტენზია, რომ ეს სოფლები გალის რაიონის შემადგენლობაში შედიოდა და ახლაც ასე უნდა იყოს. 

ჯერ კიდევ 1998 წლის გაზაფხულზე ჩატარებული ეთნიკური წმენდის დროს გალის რაიონში, აფხაზურმა მხარემ ორსანტია-განმუხურის მონაკვეთზე, ენგურზე გადებულ ხიდთან ტრაფარეტი „გალის რაიონი“ აღმართა და ხიდის ბოლოს აფხაზური დროშა ააფრიალა, ხოლო ადგილობრივი მცხოვრების სახლში, ხიდთან ახლოს შტაბი განათავსა, სადაც აფხაზური შეიარაღებული დაჯგუფებები მორიგეობდნენ. 

იგივე მოხდა სოფელ ხურჩაშიც, სადაც ქართულ და აფხაზურ მხარეებს შორის პოზიციური შეტაკებებიც მიმდინარეობდა, რასაც სოფლის განაპირას მცხოვრებთა სახლები შეეწირა. მაშინ სიტუაცია რუსეთის სამშვიდობო ძალების ჩარევის შედეგად განიმუხტა, რადგან იმ ეტაპზე რუსულმა მხარემ დაუშვებლად მიიჩნია ადმინისტრაციული საზღვრების გადახედვა. 

2008 წლის რუსეთ-საქართველოს ომის შემდეგ აფხაზურმა და რუსულმა შენაერთებმა ისევ მოახდინეს სოფელ განმუხურის ოკუპაცია და იქ მდებარე პატრიოტული ბანაკიც გადაწვეს. ადგილობრივი მოსახლეობა ვარაუდობს, რომ ამჯერად რუსი ოკუპანტები ისევ ძველი, ე.წ. „აფხაზეთის საჭოთა სოციალისტური რესპუბლიკის“ რუკით იხელმძღვანელებენ და, ჩათვლიან რა, რომ მდინარე ენგური ზუგდიდისა და გალის რაიონების ბუნებრივი გამყოფი იყო, მავთულხლართებს სწორედ ენგურის გასწვრივ გაავლებენ, რაც იმას ნიშნავს, რომ ოკუპირებულ ტერიტორიაზე დამატებით ქართული ტერიტორია მოექცევა. 

„ამისთვის ისინი სერიოზულად ემზადებიან. ნაბაკევის ბაზაზე, სადაც რუსები დგანან, ტრაფარეტებიც კი გაამზადეს და ამბობენ, რომ საზღვარი ენგურის გასწვრივ უნდა გაივლოს. როცა ვეკითხებით, ადრე ხომ ასე არ იყოო, გვპასუხობენ, რომ აფხაზების გამოცემულ რუკებზე ეს სოფლები აფხაზეთის ტერიტორიაშია მოქცეული“, - ამბობს „ნიუპოსტთან“ საუბარში ზაურ ტ.-ა. 

აფხაზეთის ლეგიტიმური ხელისუფლების წარმომადგენლები მსგავს მოსაზრებებს აბსურდულს უწოდებენ და აცხადებენ, რომ ეს თემა დღის წესრიგში არ დგას.

ოთო ალანია, "ნიუპოსტი", ზუგდიდი.