„აჭარა ჯგუფი“ სათამაშო ბიზნესს ტოვებს

ბიზნესი & ეკონომიკა - 19:27, 13 May, 2019

2951

ორი თვის წინ „აჭარა ჯგუფმა“ სასტუმრო „სტამბაში“ შემავალი კაზინო „ ავიატორი“ დახურა. როგორც აღმოჩნდა, ეს ნაბიჯი კომპანიის სტრატეგიის ნაწილია და სათამაშო ბიზნესიდან გასვლა ფინანსურ პრობლემებს არ უკავშირდება.

ამ გადაწყვეტილებლამდე, "აჭარა ჯგუფის" მფლობელმა მიმდინარე წლის 1 თებერვალს "აჭარაბეთში" ონლაინ თამაშების მიმართულებით მისი კუთვილი წილი 51% 116 მლნ ევროდ გაასხვისა, რომლის მფლობელიც, სათამაშო ბიზნესში მსოფლიოში ცნობილი ირლანდიური კომპანია – Paddy Power Betfair ჯგუფი გახდა.

Adjara Group Hospitality-ს გენერალური დირექტორმა, ვალერი ჩეხერიამ „ფორბსის კვირაში“ განაცხადა, რომ ეს იყო პირველი ნაბიჯი და გარკვეული პერიოდის შემდეგ ჯგუფი სათამაშო ბიზნესიდან საერთოდ გამოსვლაზე ფიქრობს.

„ეს იყო შემოთავაზება, საინტერესო შემოთავაზება. ბიზნესურად ავწონ-დავწონეთ და გადავდგით ეს ნაბიჯი, რომ წავსულიყავით ამ გადაწყვეტილებაზე. ეს არის მსოფლიოში უმსხვილესი კომპანია, რომელიც სათამაშო ბიზნესით არის დაკავებული, ძირითადად ონლაინით. ის ფასი, რაც ჩვენ მივიღეთ იყო ძალიან მიმზიდველი და რასაკვირველია მივიღეთ ეს გადაწყვეტილება. რაღაც პერიოდის შემდეგ ვფიქრობთ საერთოდ გამოსვლაზე ამ ბიზნესიდან“-განაცხადა ვალერი ჩეხერიამ.

„ის თანხები, რომელიც ჩვენ მივიღეთ მოხმარდება სრულიად სოფლის მეურნეობის მიმართულების განვითარებას და ახალი სასტუმროების მშენებლობას. მათ შორის ქვეყნიდან გასვლასაც“-განმარტავს ჩეხერიამ.