რამდენიმე წუთის წინ სოციალურ ქსელ „ფეისბუქზე“ გავრცელდა განცხადება, რომ საინფორმაციო სააგენტო „ზონანიუსზე“ განხორციელებული კიბერშეტევის შედეგად ყველა გამოქვეყნებული მასალა წაიშალა.

ამ დროისთვის „ზონანიუსის“ ვებ-გვერდის მიმდინარე ამბებისა და არქივის გვერდზე არცერთი მასალა არ იკითხება. მაკა ჯანაშია მომხდარში შსს-ს და მის დეპარტამენტს სუს-ს ადანაშაულებს და აცხადებს, რომ შეტევა ღიად განხორციელდა, რასაც ელექტრონულ ფოსტაზე მოსული შეტყობინებები ადასტურებს.

რედაქცია აცხადებს, რომ ყველა გამოქვეყნებული მასალის ცალკე არქივი გააჩნიათ და უმოკლეს დროში საიტზე მასალები ხელახლა აიტვირთება. ამასთან,ისინი აპირებენ, მომხდარის შესახებ ინფორმაცია საქართველოში აკრედიტირებულ ელჩებსა და საერთაშორისო ორგანიზაციებს მიაწოდოს.

"დღეს საღამოს გატყდა zonanewes-ის საიტი და ყველა ინფორმაცია, რაც ვებ-გვერდზე იდო სათითაოდ წაიშალა. ჩვენი ღრმა რწმენით, ამის შესაძლებლობა მხოლოდ შინაგან საქმეთა სამინისტროს აქვს. ჩვენი აზრით, შესაძლოა, რომ დღეს ჩვენს მიერ გამოქვეყნებული ინფორმაციიის გამო, სადაც საზოგადოებას შევატყობინეთ ღამის კლუბ "სენატში" მომხდარი ორმხრივი სროლების შესახებ, რომელზეც შსს-ს სისხლის სამართლის საქმეც კი არ აღუძრავს (ასეთი კომენტარი გააკეთა შსს-ს პრესსპიკერმა), შინაგან საქმეთა სამინისტრომ შური იძია საიტზე და შეგვიზღუდა ინფორმაციის გავრცელება. ასევე ჩვენი ღრმა რწმენით, ესაა ღია და დაუფარავი თავდასხმა მედიაზე, რის გამოც ინფორმაციას ხვალვე მივაწვდით ყველა საერთაშორისო ორგანიზაციას და ყველა საქართველოში მოქმედ საელჩოს", - წერს "ზონანიუსის" რედაქტორი მაკა ჯანაშია "ფეისბუქის" საკუთარ გვერდზე.

შეგახსენებთ, რომ საინფორმაციო სააგენტო „ზონანიუსი“ სექტემბრის დასაწყისში შეიქმნა და, ძირითადად, გაუხმაურებელი კრიმინალური ფაქტების გაშუქებით იყო დაკავებული. საიტზე ქვეყნდებოდა ექსკლუზივები, რომელთაგან ერთერთი ბოლო იყო ექსკლუზიური ინფორმაცია გუშინ ღამის კლუბ „სენატში“ მომხდარი შეიარაღებული დაპირისპირების შესახებ, რაც შსს-ს პრესსამსახურმა მოგვიანებით უარყო და განაცხადა, რომ კლუბის დაცვის წევრებმა მოკამათეთა დასაშოშმინებლად მხოლოდ პნევმატური იარაღი გამოიყენეს.