,,რაც აღა-მაჰმად ხანისა და შაჰ-აბასის დროს არ მომხდარა, ის ხდება, ჩვენი ხელით ასწლიან კაკლებსა და ვენახებს გვაჩეხინებენ. ვთხოვთ მსოფლიო საზოგადოებას, გაეროს, ევროკავშირს, ბატონ ობამას, რამენაირად თანადგომა გაგვიწიონ“, - ამის შესახებ დვანში მვხოვრებმა ერთერთმა ქალბატონმა „ტვ3“-ის ეთერში, ინგა გრიგოლიას გადაცემა „დიდ პოლიტიკაში“ განაცხადა.

„დღეს მარტო სამი მოსახლის ბედი არ წყდება, დღეს საქართველოს ბედი წყდება, სოფელი ალყაშია მოქცეული. თუ ჩემი სიცოცხლე აუცილებელია, დავდგები იმ მავრთულხლართების წინ და ტყვიის არ მეშინია, მაგრამ არცერთ ხელისუფლებას არ უღირს ეს და მოვუწოდებ ყველას, რომ ყველა ბერკეტი გამოიყენოს, მივმართავთ პუტინს - შორს ხელები საქართველოსგან. ვთხოვ მთელ საზოგადოებას დაგვიდექით გვერდით,“, - აცხადებენ დვანელები.

ისინი უარყოფენ ზოგიერთი ქართველი პოლიტიკოსის მოსაზრებას იმასთან დაკავშირებით, რომ ეს ტერიტორია 2008 წლის ომის შემდეგ დაკარგული იყო და ახლა ოსური მხარე მას იბრუნებს.

„ომის შემდეგ თუ დაკარგული იყო ეს ტერიტორია, როგორ ცხოვრობდა ეს ხალხი? ამის თქმით ჩემი ქართველები სიტყვასიტყვით იმეორებენ იმას, რასაც ოსური ხელისუფლების წარმომადგენელი გვეუბნებოდა, რომ ისინი თავიანთ კონსტიტუციურ ვალს ასრულებენ. რომ იძახიან, სააკაშვილმა მოუწყო გენოციდი ოს ხალხსო, რუსეთი არ გვიწყობს ჩვენ გენოციდს? მე მინდა, განზე გადადოთ ყველაფერი, გაერთიანდეთ და მივხედოთ ამ პრობლემას, 400-500 ჰექტრამდეა უკვე დაკარგული“, - ამბობს დვანში მცხოვრები ქალი.

,,გამოსავალი ერთადერთია - თუ მთელი ქვეყანა დადგება ფეხზე. მარტო დვანელები რომ ვდგავართ, ეგ არაფერია. არ ვამბობ იარაღის სროლას, იარაღის გარეშე არსებობს გზა, დიპლომატიური, პოლიტიკური გზა, თორემ ხვალ და ზეგ ამ ადგილზე ვეღარც დავდგებით, ზეგ და მაზეგ იქიდანაც გაგვაგდებენ, რაც ადრე გვეკუთვნოდა,“- განაცხადა ასევე ადგილობრივმა მცხოვრებმა.