პროსტიტუციისთვის ფართის გადაცემის ბრალდებით დაკავებულ როენა ხუცურაულს იგივე, "მამიდას" ბრალი ოფიციალურად წარედგინა. სასამართლო კი აღკვეთის ღონისძიების შეფარდების საკითხზე დღეს იმსჯელებს.

ადვოკატის არჩილ დავითაშვილის თქმით, სასამართლოზე მისი დაცვის ქვეშ მყოფისთვის 30 000 ლარიანი გირაოს შუამდგომლობას მოითხოვს

„არ ცნობს თავს დამნაშავედ. საქმის შეწყვეტაზე ვიშუამდგომლებთ და ალტერნატივის სახით გირაოს 30 000 ლარის ოდენობით. არ არის ისეთი მტკიცებულებები, რომელიც ბრალდების მხარეს მისცემდა ეშუამდგომლა პატიმრობის მოთხოვნით" - აღნიშნა ადვოკატმა.

მისივე თქმით, არცერთი დაკავებული ბრალს კვლავ არ აღიარებს.

როენა ხუცურაული იგივე, "მამიდა" დღეს 4 პირთან ერთად დააკავეს, რომელთაც პროსტიტუციის ხელშეწყობის და პროსტიტუციისთვის ფართის გადაცემა ედებათ ბრალად.

შინაგან საქმეთა სამინისტროს ინფორმაციით, მომხდარზე გამოძიება საქართველოს სისხლის სამართლის კოდექსის 254-ე მუხლის 1-ლი ნაწილით, ასევე, ამავე მუხლის მე-3 ნაწილის ,,ა“ და ,,გ“ ქვეპუნქტებით მიმდინარეობს. ჩადენილი დანაშაული 2-დან 6 წლამდე ვადით თავისუფლების აღკვეთას ითვალისწინებს.