"ეს იმდენად შემაშფოთებელი განცხადებაა, რომ საპატრიარქოც კი გაემიჯნა მის ამგვარ მოწოდებას" - თეოლოგები მეუფე იობის განცხადებებს ეხმაურებიან

საზოგადოება - 19:29, 03 May, 2019

4081

მეუფე იობის ქადაგებას, დავით გარეჯის მოვლენების შესახებ, თეოლოგები ეხმაურებიან . მათი თქმით ამგვარი განცხადებების გაკეთება სასულიერო პირის მხრიდან დაუშვებელია.

სულხან-საბა ორბელიანის სასწავლო უნივერსიტეტის თეოლოგიის ფაკულტეტის დეკანი, გოჩა ბარნოვი, მეუფე იობის განცხადებებს შემაშფოტებელს უწოდებს და აცხადებს, რომ ამგვარ მოწოდებას საპატრიარქოც კი გაემიჯნა მოწოდებას.

„როდესაც სასულიერო პირი ამბობს მსგავს ქსენოფობიურ განცხადებებს და მოწოდებებს, ფაქტიურად, რომ მან ქართველმა ერმა რატომღაც იარაღი უნდა აისხას და თუ რაღაც ამის მსგავსი და სისხლი დაღვაროს, ეს იმდენად შემაშფოთებელი განცხადებაა, რომ თვით საპატრიარქოც კი გაემიჯნა მის ამგვარ მოწოდებას. ეს არის არასწორი, იმიტომ რომ ქრისტიანი გახლავთ ადამიანი, რომელსაც ყველა უყვარს, ყველა ადამიანში ღმერთის ხატს ხედავს და ასეც არის. აქედან გამომდინარე, ვინმესკენ ძალადობის მოწოდება არის აბსოლუტურად მიუღებელი. მე ძალიან გამიკვირდა, როდესაც მეუფე იობმა მსგავსი განცხადება გააკეთა. ეს არის პროვოკაცია, რომელსაც ქართველი ხალხი არ აჰყვება. მათ უნდა იცოდნენ, მეუფე იობმაც და მეუფე გიორგიმ, ქართველი ხალხი ამას არ აყვება,“ - განაცხადა გოჩა ბარნოვმა.

ჟურნალისტი, საზოგადოებრივ და პოლიტიკურ ურთიერთობათა აკადემიის დირექტორი, გოჩა მირცხულავა აცხადებს, რომ აზერბაიჯანული მხარე, იმ ვითარებას, რაც დავით გარეჯში ხდება, რელიგიური კუთხით არ განიხილავს.

„რელიგიური კონფლიქტის საფრთხე არ არის, თუ ამის პროვოცირება მიზანმიმართულად არ მოხდა გარკვეული ძალების მიერ და მე, ამ შემთხვევაში, ვგულისხმობ პირველ რიგში, ურა პატრიოტულ ძალებს იმიტომ, რომ რელიგიურ ჭრილში არ განიხილავს აზერბაიჯანი ამ საკითხს. ეს არის სუფთა კულტურული საკითხი მისთვის, რა თქმა უნდა, სახელმწიფოებრივი დატვირთვის საკითხიც არის და სწორედ, როდესაც ვამბობ, რომ ქართულმა მხარემ არც კი იცის, რა კომპრომისზე მოდის აზერბაიჯანული მხარე, აი ეს არის აქ ყველაზე დიდი უბედურება“ - განაცხადა გოჩა მირცხულავამ.