პირობით ვადამდე გათავისუფლების მუდმივმოქმედმა კომისიამ 67 მსჯავრდებული გაათავისუფლა

სამართალი - 17:49, 28 Sep, 2013

1558

2013 წლის 28 სექტემბერს, სასჯელაღსრულების, პრობაციისა და იურიდიული დახმარების საკითხთა სამინისტროს პირობით ვადამდე გათავისუფლების მუდმივმოქმედმა კომისიამ 67 მსჯავრდებულის გათავისუფლების გადაწყვეტილება მიიღო. მათგან 14 ქალბატონია. კომისიამ ქალების საქმე ზეპირი მოსმენით განიხილა. კომისიამ სულ 300 მსჯავრდებულის საქმეს გადახედა, საიდანაც 67 მსჯავრდებულის გათავისუფლების გადაწყვეტილება მიიღო.
კომისიის სხდომა სასჯელაღსრულების #5 დაწესებულებაში გაიმართა. გადაწყვეტილება ქალ მსჯავრდებულებს ვადამდე გათავისუფლების კომისიის წევრებმა, მათ შორის, პარლამენტის ადამიანის უფლებათა კომიტეტის თავმჯდომარემ ეკა ბესელიამ და სასჯელაღსრულების, პრობაციისა და იურიდიული დახმარების საკითხთა მინისტრის პირველმა მოადგილემ გიგა გიორგაძემ გააცნეს.
კომისიის წევრებმა იმ მსჯავრდებულთა შუამდგომლობები განიხილეს, რომლებიც ადმინისტრაციის მხრიდან დადებითად ხასიათდებიან და მოხდილი აქვთ ნაკლებად მძიმე დანაშულზე სასჯელის ნახევარი, მძიმეზე - 2/3, ხოლო განსაკუთრებით მძიმეზე -3/4. შუამდგომლობების განხილვისას კომისიის წევრებმა გაითვალისწინეს მსჯავრდებულთა ჯანმრთელობის და ოჯახური მდგომარეობა. ამასთანავე შეფასდა მსჯავრდებულის მხრიდან დანაშაულის განმეორებით ჩადენის რისკები.